पोखरा, २८ पुस। पोखरा–८, सभागृहचोकस्थित नयनतारा कृषि सहकारी संस्था लिमिटेडको चौथो वार्षिक साधारण सभा शनिबार सम्पन्न भएको छ।

वनभोजबीच भएको साधारणसभामा सहकारी अध्यक्ष नृपेश अधिकारीले आगामी दिनमा कर्मचारी, सञ्चालक समिति, लेखा समिति, ऋण लगानी उपसमिति र सेयर सदस्यलाई तालिम व्यवस्था गर्ने बताए । उनले कृषि कर्जा र शैक्षिक कर्जामा न्यून ब्याजदर राखी कृषि कार्यक्रम अगाडि बढाउने र पशु व्यवसायपालनको निम्ति उपयुक्त स्थानको अध्ययन गरिने बताए।

सहकारी कोषाध्यक्ष विष्णुप्रसाद पहारीले सहकारीका नीति नियमलाई आधार मानी सामूहिक जमानी कर्जा, धितो कर्जा, हायरपर्चेज कर्जा र मुद्दती रसिद धितो कर्जा लगानी गरेको जानकारी दिए।

कार्यक्रममा सेयर सदस्यतर्फबाट सोमप्रसाद शर्माले शुभकामना मन्तव्य राखेका थिए।

साधारणसभाले सहकारी कोषाध्यक्ष विष्णुप्रसाद पहारीको आर्थिक प्रतिवेदन, लेखा समिति संयोजक रति त्रिपाठी ढकालको लेखा समितिको प्रतिवेदन सर्वसम्मत पारित गरेको छ।

सहकारी अध्यक्ष अधिकारीको अध्यक्षतामा सम्पन्न भएको कार्यक्रममा स्वागत उपाध्यक्ष अमृतकुमार बराल, सल्लाहकार शिव भुजेलले सहकारीका सात सिद्धान्त वाचन र सचिव सन्तोष त्रिपाठीले सञ्चालन गरेका थिए।