पोखरा, ७ साउन । गण्डकी विकास बैंक लिमिटेड र युनियन लाईफ इन्स्योरेन्स कम्पनि लिमिटेडबीच बैंकास्योरेन्ससम्बन्धी सम्झौता भएको छ।

सम्झौतापत्रमा बैंकतर्फबाट प्रमुख कार्यकारी अधिकृत रेशमबहादुर थापा र युनियन लाइफ इन्स्योरेन्स कम्पनी लिमिटेडका प्रमुख कार्यकारी अधिकृत मनोजकुमार लाल कर्णे हस्ताक्षर गरेका छन् ।

सम्झौता युनियनले जारी गर्ने विभिन्न जीवन बिमा योजना गण्डकी विकास बैंकको देशभर रहेका शाखा कार्यालयबाट उपलब्ध हुने छन्।

गण्डकी विकास बैंक लि. केन्द्रिय कार्यालय सहित देशैभरी फैलिएका आफ्ना ६८ शाखा कार्यालय मार्फत पूर्णकालीन बैंकिङ सेवा प्रदान गर्दै आएको छ।  बैंकले ग्राहकको लागि आर्कषक व्याजदरका विभिन्न निक्षेप योजना परिचालन गर्नुका साथै सहज र सरल रुपमा कर्जा प्रवाह समेत गर्दैआएको छ।

यसका अतिरिक्त बैंकले एबीबीएस, एटिएम, एसएमएस, सीआस्वा, आईपीएस, मोवाइल बैंकिङ सेवा लकर सेवा, सुन धितोमा कर्जा सुविधा, रेमिट्यान्स सेवा, केन्द्रिय कार्यालय लगायत केही शाखाबाट ३६५ दिने बैंकिङ सेवा तथा सन्ध्याकालीन सेवा समेत प्रदान गर्दै आएको छ । यस्तै न्यून आय भएका व्यक्तिलाई विपन्न वर्ग कर्जा तथा समूहमा आबद्ध व्यक्तिहरुका लागि लघुवित्त कर्जा पनि प्रदान गर्दै आएको छ।

साथै बैंकका विभिन्न ठाँउमा ९ वटा शाखाहरु निर्माणधिन अवस्थामा रहेका छन्। यस पश्चात बैंकका ७७ वटा शाखा र देशका सातै प्रदेशबाट बैंकिङ सेवा प्रदान हुने प्रमुख कार्यकारी अधिकृत रेशमबहादुर थापाले बताए ।