पोखरा, ४ असार । गण्डकी विकास बैंक लिमिटेडका नवनिर्वाचित अध्यक्ष सुशील गौचनले सोमबार नेपाल राष्ट्र बैंकका डेपुटी गभर्नर शिवराज श्रेष्ठबाट शपथ ग्रहण गरेका छन् ।

गत जेठ २५ मा बसेका बैंकको १० औं वाषिर्क साधारण सभाले सुशील गौचन, पद्मप्रसाद पौडेल, किशोर ओझा, नारायणबहादुर बानियाँ, कृष्णबहादुर थापा र वासुदेव त्रिपाठीलाई सञ्चालक पदमा निर्विरोध निर्वाचित गरेको थियो ।

पछि नवनिर्वाचित सञ्चालकको बैठकले गौचनलाई बैंकको सञ्चालक समितिको अध्यक्षमा सर्वसम्मत चयन गरेको थियो ।

पोखरामा प्रधानकार्यालय रहेको गण्डकी विकास बैंकको साधारण सभापछि बैंकको चुक्ता पुँजी २ अर्ब ७५ करोड पुगेको बैंकका सहायक प्रमुख कार्यकारी अधिकृत तारानाथ लम्सालले जानकारी दिए ।

चुक्ता पुँजी आधारमा गण्डकी नेपालको सबैभन्दा धेरै चुक्ता पुँजी भएको विकास बैंक भएको बैकको दाबी छ ।

बैंकले नेपालको पूर्वदेखि पश्चिमसम्म ६२ वटा शाखा सञ्चालनमा ल्याएको छ भने थप १५ वटा शाखा चालु आवभित्र सञ्चालनमा ल्याउन तयारी गरेको बैंकले जनाएको छ ।