दमौली ।  सरसफाइ विज्ञ नमस्तेलाल भूमिबारेमा लिखित ‘नमस्तेलाल देशभित्र, देशबाहिर’ पुस्तकको आज विमोचन गरिएको छ । तनहुँको बन्दीपुर गाउँपालिका निवासी भूमिबारे लेखिएको उक्त पुस्तकको दमौलीमा आयोजित कार्यक्रममा तनहुँ क्षेत्र नम्बर २ का प्रतिनिधिसभा सदस्य शङ्कर भण्डारीले विमोचन गर्नुभएको हो ।

उक्त पुस्तकमा विभिन्न समयमा विभिन्न पत्रपत्रिकामा छापिएका सामग्री सङ्कलन गरिएको छ । नकारात्मक कुराले जरो गाडेको वर्तमान परिप्रेक्ष्यमा सकारात्मक सोचको भावना विकास गर्ने उद्देश्यसहित पुस्तक प्रकाशनमा ल्याइएको सरसफाइ विज्ञ भूमिले जानकारी दिनुभयो । उहाँले भन्नुभयो, “धेरै नकारात्मकताको विकास भएको सन्दर्भमा यसलाई चिर्दै सकारात्मक भावनाको विकासका लागि पुस्तकले सहयोग पु¥याउने विश्वास गरेको छु ।”

प्रतिनिधिसभा सदस्य एवं पूर्वमन्त्री शङ्कर भण्डारीले हरेक व्यक्तिले सकारात्मक सोच राख्नुपर्नेमा जोड दिनुभयो । सकारात्मक सोचको विकास गर्न सकेमात्रै देशमा समृद्धि सम्भव रहेको उहाँको भनाइ छ । उहाँले भन्नुभयो, “मान्छेमा नकारात्मक बढी हावी छ । देशमा केही भएन भन्ने जमात बढी छ । देश विकासका लागि के गर्न सकिन्छ त्यसतर्फ सकारात्मक भएर अगाडि बढ्नुपर्ने अहिलेको आवश्यकता हो ।”

राष्ट्रिय स्वतन्त्र पार्टी तनहुँका संयोजक विश्व बास्तोलाले नमस्तेलाल भूमिले देश तथा देशबाहिर पु¥याउनुभएको योगदानलाई एकीकृत गरी पुस्तक प्रकाशन गरिएकाले यो एक दस्ताबेज बन्न सक्ने उल्लेख गर्नुभयो । पुस्तकमा नमस्तेलालबारे पत्रिकामा छापिएका पाँच सामग्री, पत्रिका, स्मारिकालगायतमा छापिएका पाँच अन्तवार्तासार, पाँच कविता, अन्तर्राष्ट्रिय मिडियामा नमस्तेलालका पाँच सामग्री समेटिएको छ ।

तनहुँको बन्दीपुरमा जन्मिनुभएका भूमिले युनिसेफ, लुथरेन वल्र्ड सर्भिस, अमेरिका पिस कोस्र्प, युनाइटेड मिसन अफ नेपालमा काम गरिसक्नुभएको छ । विशेषगरी नेपालमा खुला दिसामुक्त घोषणाको सन्दर्भमा उहाँले सरसफाइको क्षेत्रमा योगदान दिनुभएको थियो ।

उहाँले यसअघि आफ्नै माटो आफ्नै बाटो र सकारात्मक सोच, खोज र रोज पुस्तक प्रकाशन गरिसक्नुभएको छ । रासस