पोखरा । उपप्राध्यापक सुरज पौडेलद्वारा लिखित ‘प्रिया !’ मुक्तक संग्रह लोकार्पण गरिएको छ ।

सिर्जनशील लोकतान्त्रिक प्रतिष्ठान पोखरा आयोजनामा शनिबार एक कार्यक्रमबीच लेखक तथा शिक्षाविद् विष्णुप्रसाद अधिकारीले उक्त कृति लोकार्पण गरेका हुन् ।
अधिकारीले प्राध्यापक निष्कलंक हुनुपर्नेमा जोड दिँदै साहित्यको शक्ति जीवन्त रहने औंल्याए । उनले विद्यार्थीमा नैतिक आचारण सिकाउन सुझाव दिँदै सबै कुरालाई आर्थिक नजरले मात्रै हेर्ने पारीपाटीको अन्त्य गर्नुपर्ने सुझाए । पछिल्लो समय प्राध्यापकहरु राजनीतिक रुपमा प्रतिबद्ध रहँदा प्राज्ञिक मूल्य मान्यता हराउँदै गएकोतर्फ उनले सचेत गराए ।

प्रतिष्ठान पूर्व अध्यक्ष दीपेन्द्र पराजुलीले प्रिया मुक्तक संग्रहलाई हरेक कोणबाट नियाल्न सकिने स्पष्ट पार्दै स्रष्टालाई व्यक्तिबाट माथि उठी व्यक्तित्वका रुपमा चिन्नुपर्ने बताए ।
परिचर्चाकार डा. श्रीधर न्यौपानेले कविताको लधुत्तम एकाइ रुपमा मुक्तकलाई चिनाउँदै समग्रमा प्रणायमूलक विषयवस्तु समेटी संग्रह प्रकाशन गरिएको स्पष्ट पारे । उनले विषय संयोजनका दृष्टिले संग्रह सवल कृति रहेको भन्दै त्यसमा गहन विम्व प्रतिकको संयोजन भएको जनाए ।

कृतिमा अनुभूतिलाई हतारो गर्दा कतिपय शब्दसंयोजन तथा वर्णविन्यासगत त्रुटि फेला परेको भन्दै परिचर्चाकार डा. न्यौपानेले कतिपय मुक्तकहरु विषयान्तर भएको धारणा राखे । सर्जक पौडेलले ‘प्रिया !’ जन्मनुमा सहकर्मीहरुको महत्वपूर्ण योगदान रहेको स्मरण गर्दै अध्ययन गरी सुझाव दिन आमपाठकमा आग्रह गरे ।

प्रतिष्ठानका पूर्व अध्यक्ष डा. भूमिराज बस्ताकोटीले सष्टा परिचय दिँदै सरल, मिलनसार, वचनबद्ध व्यक्तित्वका रुपमा कृतिका लेखक पौडेललाई चिनाए ।

कार्यक्रममा धु्रवराज पौडेल, जय चापागाईं लगायतको समूहले सांगीतिक प्रस्तुति राख्यो । त्यस्तै रीता अधिकारी, श्रीराम अधिकारी, प्रतिष्ठानका कोषाध्यक्ष हरिश्चन्द्र भण्डारी लगायतले रचना वाचन गरे ।

प्रतिष्ठान अध्यक्ष विष्णुप्रसाद शर्माको अध्यक्षतामा भएको उक्त कार्यक्रममा उपाध्यक्ष हिममाया पौडेलले स्वागत तथा सचिव डा. भानुभक्त आचार्यले कार्यक्रम सञ्चालन गरे । ९६ पृष्ठको उक्त कृतिमा १ सय ५५ मुक्तक संग्रहित छन् ।