पोखरा । गण्डकी प्रदेशका मुख्यमन्त्री सुरेन्द्रराज पाण्डेले प्रदेशको समग्र शान्ति सुरक्षालाई थप मजबुद र विश्वसनीय बनाई जनमैत्री र नागरिक केन्द्रित प्रहरी सेवा प्रदान गर्न प्रहरीलाई निर्देशन दिएका छन् । गण्डकी प्रदेश प्रहरी कार्यालयको स्थलगत अवलोकन तथा निरीक्षणका क्रममा मंगलबार उनले भरपर्दो सुरक्षा व्यवस्था मिलाउन र सरकारबाट तोकिएका विभागीय नीति निर्देशन समेतलाई मध्यनजर राखी आआफ्नो जिम्मेवारी त्रुटिरहित तवरबाट सम्पादन गर्न निर्देश दिएका हुन् ।

निरीक्षणका क्रममा मुख्यमन्त्री पाण्डेले गण्डकी प्रदेश प्रहरी कार्यालय अन्तर्गत रहेका विभिन्न शाखाहरु, मातहतका सम्पूर्ण प्रहरी कार्यालयको भौतिक संरचना, जनशक्ति व्यवस्थापन तथा प्रहरी गतिविधिबारे जानकारी समेत लिएका थिए ।

उक्त अवसरमा गण्डकी प्रदेश सरकारका प्रमुख सचिव लक्ष्मीकुमारी बस्नेत, सचिव तीर्थराज भट्टराई, प्रहरी वरिष्ठ उपरीक्षक, प्रहरी उपरीक्षक, सिनियर प्रहरी अधिकृत, जुनियर प्रहरी अधिकृत तथा जवानहरुको उपस्थिति थियो ।

गण्डकी प्रदेश प्रहरी प्रमुख प्रहरी नायव महानिरीक्षक विकासराज खनालले मुख्यमन्त्री पाण्डेको निर्देशनले आगामी दिनमा प्रहरी थप व्यावसायिक र ऊर्जावान हुने विश्वास व्यक्त गर्दै धन्यवाद् व्यक्त गरे ।

कार्यक्रममा नेपाल प्रहरी प्रदेश कार्यालयका प्रमुख प्रहरी वरिष्ठ उपरीक्षक दीपक रेग्मीले स्वागत र प्रहरी नायव उपरीक्षक प्रकाश श्रीमलले गण्डकी प्रदेशको समग्र शान्ति सुरक्षाको विषयमा प्रस्तुतिकरण गरे ।