लुम्लेमा आगलागी

आदर्श समाज सम्वाददाता
फागुन १३, २०८०
lumle aago

पोखरा । अन्नपूर्ण गाउँपालिका–६, लुम्लेको भीरमा आगलागी भएको छ । आइतबार दिउँसो स्थानीय गुप्ते भीरबाट सुरु आगलागी यो समाचार तयार पर्दासम्म नियन्त्रणमा आउन सकेको छैन ।

गुप्ते भीर ढाँकेबाट कान्छी वराह जाने पैदल मार्गअन्तर्गत पर्दछ । करिब ३ बजेबाट सुरु उक्त आगलागीले साँझसम्म ४ हेक्टर बढी जंगल नष्ट गरिसकेको छ । आगलागी नियन्त्रणका लागि आइतबार सयौं स्थानीयवासी तथा नागडाँडा प्रहरी चौकी एवं नयाँपुल प्रहरी चौकीबाट जनशक्ति खटिएको भए पनि अप्ठ्रो भीरका कारण नियन्त्रणमा लिन नसकिएको वडाध्यक्ष एकदेव देवकोटाले बताए ।

आगो क्रमश गुप्ते भीरबाट पश्चिम चन्द्रकोटतर्फको क्षेत्रमा फैलिरहेको छ । जसबाट ढाँकेमा (गाउँको माथिल्लो भाग) रहेका आशामाया विक, मनबहादुर नेपाली, कुलबहादुर नेपाली, बाटुली नेपाली र च्यानमारे साइलीको घर केही जोखिममा परेका छन् । यद्यपि रातपरे पनि स्थानीयले त्यस क्षेत्रमा अग्नि रेखा निर्माण जारी राखेका छन् ।
आगलागी के कति कारण कसले लगायो हालसम्म खुल्न सकेको छैन । यद्यपि घाँस राम्रो पलाउने विश्वासले आगलागी गराइएको हुनसक्ने शंका गरिएको छ ।

Related News

सम्बन्धित समाचार

hero news full width

trending post

ट्रेन्डिङ्ग