पोखरा । अली मियाँ लोक वाङ्मय प्रतिष्ठानद्वारा स्थापित अलीमियाँ लोकवाङ्मय सम्मान पुरस्कार लोक गायक तथा संस्कृतिकर्मी नारायण रायमाझीलाई प्रदान गरिने भएको छ ।

लोककवि अलीमियाँको १०६ औं जन्मजयन्ती समारोहका सन्दर्भमा फागुन १५ गते एक विशेष समारोहबीच रायमाझीलाई पुरस्कार अर्पण गरिने छ ।

पुरस्कारको राशि ५० हजार रुपैयाँ, सम्मानपत्र र दोसल्ला रहेको छ । विगत ४ दशकभन्दा अघिदेखि लोकवाङ्मयमार्फत् लोकसाहित्यमा विशेष योगदान गर्नुका साथै नेपाली फिल्ममा समेत लोकगीतलाई समावेश गरी नेपाली संस्कृतिको उन्नयनमा रायमाझीको उल्लेखनीय भूमिका रहेको छ ।

यसअघि उक्त पुरस्कारबाट जनकविकेशरी धर्मराज थापा, लोकगायिका हरिदेवी कोइराला, खिमबहादुर गन्धर्व, प्रेमराज महत, बमबहादुर कार्की, भेडीखर्के साइँला, चूडामणि बन्धु, मोतीलाल पराजुली, डा. बाबुराम अधिकारी, चेतन कार्की, डा. जगमान गुरुङ सम्मानित भइसकेका छन् ।

यस वर्ष प्रदान गरिने पुरस्कारका लागि प्राडा. कुसुमाकर न्यौपानेको संयोजकत्वमा रामबहादुर कोइराला र लोकचन्द्र खनाल सदस्य रहेको प्रतिभा चयन उपसमितिले सिफारिस गरेबमोजिम फागुन ११ गते शुक्रबार बसेको कार्यसमितिको बैठकले रायमाझीलाई सम्मान गर्ने निर्णय गरेको अलीमियाँ लोकवाङ्मय प्रतिष्ठानका सचिव पदमराज ढकालले जानकारी दिए ।