पोखरा । रविन्द्र माकाजुद्वारा लिखित दीपक बाटाजुुद्वारा प्रकाशित पं.ऋषिकेशव पराजुलीको जीवनीमा आधारित ‘उदाहरणीय व्यक्तित्व पं.ऋषिकेशव’ नामक पुस्तक विमोचन गरिएको छ ।

राष्ट्रिय माविको हीरक जयन्तीका अवसरमा एक कार्यक्रमबीच नेपाल संगीत तथा नाट्य प्रज्ञा प्रतिष्ठानका पूर्व कुलपति सरुभक्तले पुस्तकको विमोचन गरेका हुन् । पोखराका वरिष्ठ शिक्षाशसेवी स्व.ऋषिकेशव पराजुुली पोखराको पृथ्वीनारायण क्याम्पस, राष्ट्रिय मावि, कन्या स्कुल, नवीन मावि र पोखरा वृद्धाश्रमका संस्थापक रहेका थिएइ ।

कार्यक्रममा प्राज्ञ सरुभक्तले निस्वार्थ कर्मयोगीहरू कहिल्यै नहार्ने बताउँदै गण्डकी प्रदेशमा शिक्षा, समाजसेवा र लोकतन्त्रका लागि आजीवन संघर्ष, समन्वयको भूमिका निर्वाह गर्दै आएका प. ऋषिकेशव पराजुलीको जीवन आगामी पुस्ताका लागि अनुकरणीय रहेको बताए ।

वरिष्ठ नाट्यविद् प्राडा रामचन्द्र पोखरेलले स्व.ऋषिकेशव पराजुली स्वयं विवेकशील स्रष्टा र द्रष्टा दुवै भएको बताए । सेवा नै धर्म हो भनेर आफ्नो जीवन अर्पिएका पराजुलीले आफ्नो उत्तराद्र्धमा असहाय बेवारिसे ज्येष्ठ नागरिकलाई उद्धार हुने कर्म गरेको पोखरेलले उल्लेख गरे ।

कार्यक्रममा राष्ट्रिय माविका अध्यक्ष रामविक्रम राणा, लेखक रवीन्द्र माकाजु, प्रकाशक दीपक बाटाजु, साठीघरे पराजुली समाजका अध्यक्ष विश्वगोपाल पराजुली, प्रेस स्वतन्त्रता सेनानी कुसुम केशव पराजुली, समाजसेवी बरुणविक्रम राणालगायतले पराजुलीको सामाजिक एवं राजनीतिक क्षेत्रमा पु¥याएको योगदानको चर्चा गरे ।