पोखरा । रोटरी क्लब अफ गण्डकीको आयोजनामा शनिबार पोखराको छोरेपाटनमा निशुल्क स्वास्थ्य शिविर भएको छ । शिविरमा ३ सय १२ जनाले स्वास्थ्य जाँच गराएका छन् । शिविरमा नेपाल आयुर्वेद औषधी व्यवसायी संघ कास्की र लाइफकेयर डाइनोस्टिक एण्ड रिसर्च सेन्टर प्रालिले प्राविधिक सहयोग गरेका थिए ।
क्लबका अध्यक्ष किसान सुनारले सामाजिक उत्तरदायित्व बहन गर्ने उद्देश्यले निशुल्क स्वास्थ्य शिविर सञ्चालन गरेको बताए । ‘रोटरी क्लबले सामाजिक उत्तरदायित्वमा रहेर काम गर्दै आएको छ, मेरो कार्यकालमा पनि सामाजिक उत्तरदायित्वमा रहेने नै काम गर्ने प्रतिवद्धता गरेको छु’, सुनारले भने, ‘आजको स्वास्थ्य शिविर आर्थिक अवस्था कमजोर भएका स्थानीयहरुलाई मध्यनजर गरेर सञ्चालन गरेका छौं ।’
उनका अनुसार निशुल्क स्वास्थ्य शिविरमा हाडजोर्नी तथा नसा सम्बन्धी, स्वासप्रस्वास, स्त्री तथा प्रसूती रोग, पेट सम्बन्धी रोग र गुदद्वार सम्बन्धी रोगको निशुल्क जाँच तथा औषधी वितरण गरिएको थियो । शिविर उद्घाटन रोटरी डिस्ट्रिक ३२९२ का पूर्व गभर्नर किरणलाल श्रेष्ठले गरेका थिए । पोखरा महानगरपालिका–१७ वडा कार्यालय, वाराही टोल सुधार समिति र पुल्चोक टोल सुधार समितिको स्थानीय व्यवस्थापनमा स्वास्थ्य शिविर भएको हो ।