पोखरा । कर्मफ्लाइट्सद्वारा एडुटेक नेपालको सहकार्यमा वागलुङका २ विद्यालयमा आइसिटी कम्प्युटर ल्याब स्थापना गरी हस्तान्तरण गरिएको छ । ढोरपाटन–९, सुकुरदुङस्थित सरस्वती माध्यमिक विद्यालय र निसीखोला गापाको लेवाङस्थित झुपरीकोट आविमा आइसिसटी कम्प्युटर ल्याब स्थापना गरी हस्तान्तरण गरिएको हो ।

निसीखोला गापा १ लेबाङस्थित झुपरीकोट आविमा गापाका शिक्षा शाखा प्रमुख तथा कार्यक्रमका प्रमुख अतिथि मन्जु सुवेदीले आइसिटी ल्याब समुद्घाटन गर्दै गाउँपालिकाको गुणस्तरीय शिक्षा प्राप्तिमा यस प्रकारको प्रयोगशाला हुनुले अत्यन्तै ठुलो अर्थ राख्ने बताए । उनले आइसिटी ल्याब भएका विद्यालयका शिक्षकहरूलाई कर्मफ्लाइट्स र एडुटेक नेपालको सहकार्यमा कम्प्युटर तलिम प्रदान गरिने बताए ।

कर्मफ्लाइट्सका कार्यक्रम निर्देशक प्रेम कुँवरले आइसिटी ल्याब परियोजना थिन क्लाइन्ट् सिस्टम कार्यान्वयनमार्फत् विद्यार्थीहरूको लागि आधुनिक सिकाइ वातावरण सिर्जना गर्ने र बालबालिकालाई २१ औं शताब्दीका विश्व नागरिक बनाउन सहयोग पुर्‍याउने उद्देश्य रहेको बताए । कर्मफ्लाइट्सले एडुटेक नेपालको प्राविधिक तथा आर्थिक साझेदारीमा १८ वटा आधुनिक कम्प्युटर ल्याब स्थापना गरिसकेको छ ।

कर्यक्रममा बिशिष्ट अतिथिको रुपमा आमन्त्रित एडुटेक नेपालका पश्चिम नेपाल परियोजन प्रमुख आकाशकुमार दासले २ शक्तिशाली सर्भर र २० मोनिटरहरूको प्रयोग गरी सर्भर कम्प्युटरबाट प्रयोगकर्ता कम्प्युटरहरू नियन्त्रण र निगरानी गर्ने गरी राखिएको बताए ।