पोखरा । साहित्यकार ईश्वरमणि अधिकारीको चौथो साहित्यिक कृति सम्बोधिकाको दोश्रो संस्करण माया पब्लिकेशन काठमाडौँबाट आउने भएको छ | ईश्वरमणि अधिकारी, नेपाली साहित्यमा स्थापित नाम हो | लमजुंग जिल्लाको भारतेमा जन्मिएका अधिकारीले त्रिभूवन विश्वविद्यालयबाट गणितमा विद्यावारिधि गरेका छन् |

पेशाले गणितको अध्ययन-अनुसन्धान तथा प्राध्यापन कर्ममा क्रियाशील उनी नेपाली साहित्यमा कविता, गीत, गजल, मुक्तक, हाइकु, आख्यानका अतिरिक्त समालोचनाका क्षेत्रमा पनि त्यत्तिकै क्रियाशील भेटिन्छन् |

उनका रचनामा भावनाको गम्भीरता, हृदयको भाषा र समयको तस्बिर पाइन्छ | झिनो तथा सामान्य लाग्ने विषयमा पनि मर्मस्पर्शी साहित्य रचना गर्नु उनको कलमको अर्को विशेषता हो | मुलुककै अग्रणी संस्था पोखरेली युवा सांस्कृतिक परिवारको अध्यक्ष बनेर कुशल कार्यसम्पादन गरिसकेका डा अधिकारीका समयको तस्बिर कविता संचयन तथा हृदयको आलाप गजल संचयन प्रकाशित भैसकेका छन् |

नेपाली लेखक सङ्घ, लघुकथा प्रतिष्ठान तथा अन्य थुप्रै वाङ्गमयिक संस्थाहरूमा आबद्द डा अधिकारी एकताका विभिन्न एफ.एम. हरूमा साहित्यिक कार्यक्रम संचालन गरेर साहित्य अनुरागीका घर घरमा गुन्जिन्थे | समता काव्य सम्मान, शिवपुरी साहित्य सम्मान, गजल प्रतिभा सम्मान, पत्थर गजल प्रतिभा सम्मान, झलक-पुष्पा साहित्य सम्मान, नेपाल विद्याभुषण क तथा थुप्रै राष्ट्रिय तथा अन्तराष्ट्रिय सम्मान तथा पुरस्कारद्वारा सम्मानित डा अधिकारीका गणितका केही पाठ्यपुस्तक तथा अनुसन्धान पत्रहरू पनि प्रकाशित छन् |

साहित्यका अन्य विधाका केही कृतिहरू प्रकाशनको क्रममा छन् | साहित्यको चोटिलो र प्रभावकारी विधा मानिने मुक्तकमा पनि डा अधिकारी उत्तिकै सशक्त छन् | विषयवस्तुको विविधता, भाव गाम्भीर्य, अनुभूतिको तीव्रता तथा काव्यिक सघनता उनका मुक्तकका विशेषता हुन् | वर्तमान समयको बिम्बलाई टपक्क टिपेर काव्यिक तथा सौन्दर्य चेतले भरिएका एक सय एघार मुक्तकहरूको सुन्दर संग्रहभित्र प्रेमिल मुक्तकका अतिरिक्त दार्शनिक, सामाजिक र राजनैतिक चेतले भरिएका मुक्तकहरू रहेका छन् ।

सम्बोधिकाको सार तत्व यथावत राखी केही प्राविधिक परिमार्जनसहित छिट्टै अर्को संस्करण माया पब्लिकेशनबाट आउन लागेको हो | कृतिको पहिलो संस्करणको प्रकाशक भने पोखरेली युवा सांस्कृतिक परिवार रहेको छ |