पोखरा, १६ चैत । बौद्ध उपवास संस्था, पोखराको आयोजनामा पोखरामा आयोजित ३ दिने बौद्ध उपवास सिङढुव पूजा २०७९ शुक्रबार सम्पन्न भएको छ ।

पोखरा १० रंगशाला गेटस्थित अवलोकिटेश्वर महाविहार, न्युङ्ने गुम्बामा आयोजित कार्यक्रममा प्रमुख वाचक खेम्बु रिम्पोछे किरणध्वज तुलाचन रहेका थिए । विश्वशान्ति र मानव कल्याणका लागि यो कार्यक्रम आयोजना गरिएको रिम्पोछे तुलाचनले जानकारी दिए । यो पूजा बुद्ध स्वरुपमा आधारित आर्यलोकेश्वरको हो । देशमा फैलिएको अशान्ति, नराम्रो रोगको निवारण र प्राणीजगतले बुद्धत्व पाओस् भन्ने उद्देश्यले पूजा गरिएको उनले सुनाए ।

एक छाक शाकाहारी भोजन खाएर भक्तजनले भाग लिएको पूजामा विशेषगरी थकाली, गुरुङ र अन्य समुदायका भक्तजनको समेत सहभागिता रहेको आयोजक संस्थाकी सचिव आत्मा तुलाचनले जानकारी दिइन् । हरेक वर्ष आयोजना हुने पूजा बीचमा ३ वर्ष कोभिडका कारण रोकिए पनि अहिले पुनः निरन्तरता दिइएको उनले जानकारी दिइन् ।