पोखरा, ३० वैशाख । तनहुँको व्यास नगरपालिकाका मेयर उम्मेदवार दीपकराज जोशीमाथि कुटपिट गरिएको छ । शुक्रबार स्थानीय तह निर्वाचनमा मतदानस्थल निरीक्षणक्रममा व्यास ८ रिस्ती पुगेका जोशीमाथि कांग्रेस कार्यकर्ताले कुटपिट गरी टाउको फुटाइदिएका हुन् ।

उनको टाउको र निधारका विभिन्न भागमा गहिरो चोट लागेको छ । मतदान ढिलो भएपछि निरीक्षणक्रममा गएका जोशीमाथि स्थानीय कांग्रेस कार्यकर्ताले कुटपिट गरेको प्रहरीले जनाएको छ ।

दीपकराज कांग्रेस पूर्व सहमहामन्त्री गोविन्दराज जोशीका छोरा हुन् । उनी नेकपा एमालेको समर्थनमा मेयरमा स्वतन्त्र उम्मेदवारी दिएका थिए ।

जिल्ला प्रहरी कार्यालय तनहूँका प्रहरी प्रवक्ता युवराज खड्काले घटनाबारे अनुसन्धान भइरहेको बताए ।

आफू उम्मेदवार भए पनि सुरक्षा नपाएको जोशीले गुनासो गरे । आफूमाथि ज्यान लिने हिसाबले आक्रमण भएको उनको दाबी छ ।

मोहनराज बतासले एकपक्षीय रुपमा मतदान भएको सूचना पाएपछि निरीक्षणका क्रममा जाँदा एक्कासी कुटपिट भएको जोशीको भनाइ छ । मतदान कार्य केहीबेर स्थगित भइ पुनःसंचालन गरिएको मुख्य निर्वाचन अधिकृत हरिश्चन्द्र ढुंगानाले बताए ।
यसैबीच, मेयर उम्मेदवार दीपकराज जोशीका तर्फबाट व्यास ८ रिस्ती मतदान केन्द्रको मतदान स्थगित गर्न माग गरिएको छ ।
सुपुत्रको तर्फबाट पिता गोविन्दराज जोशी तथा एमाले नेता राजेश्वर ढकालले निवेदन दिंदै मतदान केन्द्र एकलौटी रुपमा नियन्त्रण लिएर मतदान गराइएको भन्दै स्थगितको माग गरेका हुन् ।