पोखरा । लोप हुँदै गएको परम्परागत र मौलिक नेपाली पञ्चेबाजा संरक्षणका लागि स्याङ्जाको आँधीखोला गाउँपालिकाले बाजा समूहलाई पञ्चेबाजा वितरण गरेको छ । गाउँपालिकाले पालिका ६ वटै वडाका ८ वटा बाजा समूहलाई पञ्चेबाजा वितरण गरेको हो ।

पञ्चेबाजा संरक्षणका लागि चालु आवमा विनियोजन गरेको बजेटबाट पञ्चेबाजा बजाउन सक्रिय दलित समुदायलाई पञ्चेबाजाको २ वटा नरसिंह, २ वटा सनही, २ वटा दमाहा, एउटा ढोलकी, एउटा ट्याम्को र एउटा झ्याली वितरण गरेको गाउँपालिका अध्यक्ष सुधीरकुमार पौडेलले जानकारी दिए । पञ्चेबाजाको धूनले पर्यटकलाई आकर्षण गर्ने र यसबाट आयआर्जनमा सहयोग पुग्ने अपेक्षासहित बाजा वितरण गरिएको अध्यक्ष पौडेलले बताए ।

करिब ८ लाख रुपैयाँ लागतमा खरिद गरिएका बाजा विभिन्न वडामा रहेका पञ्चेबाजा समूहलाई हस्तान्तरण गरिएको हो । सिरुवारी बाजा समूह आँधीखोला १, माझकटेरी बाजा समूह आँधीखोला १,उखुवारी बाजा समूह आँधीखोला २, मडुवा नौमति बाजा समूह आधीखोला २,पाख्रीबोट बाजा समूह आँधीखोला ३, पञ्चासे बाजा समूह आँधीखोला ४, सेपत बाजा समूह आँधीखोला ४, अरिंगाले बाजा समूह आँधीखोला ५ लाई बाजा उपलब्ध गराइएको हो ।

अरिंगाले बाजा समूह आँधीखोला ५ का अध्यक्ष ठाकुर परियारले वर्षौं पहिले खरिद गरेका बाजालाई मर्मत गरेर चलाउने गरिएको र नयाँ बाजा महँगो पर्ने भएकाले धेरै बाजा समूहले किन्न नसक्ने अवस्थामा रहेकोमा पालिकाले बाजा दिएपछि खुसी भएको व्यक्त गरे ।

कार्यक्रममा बाजा वितरणसँगै प्रथम कार्यकालमा सम्पादित कार्यहरुको सँगालो श्वेतपत्र विमोचन तथा सार्वजनिकीकरण, विद्यालय स्वच्छ खानेपानी कार्यक्रम अन्तर्गत सम्पूर्ण विद्यार्थीको लागि युरोगार्ड र पानी ट्यांकी हस्तान्तरण गरियो । साथै गरीब तथा जेहेनदार विद्यार्थीका लागि छात्रवृत्ति वितरण गरिएको गाउँपालिकाका सूचना प्रविधि अधिकृत रोशन लामिछानेले बताए ।