वालिङ । मत्स्य विकास केन्द्र मिर्मीले ३५ हजार माछाका भुरा वितरण गरेको छ । वालिङ र पुतलीबजार नगरपालिकाका किसानको माग आधारमा ३५ हजार माछाका भुरा वितरण गरिएको केन्द्रका प्रमुख रविन्सन अधिकारीले जानकारी दिए ।
‘गण्डकी प्रदेशका सबै जिल्ला कार्यक्षेत्र रहेको यस केन्द्रले पहिलो चरणमा स्याङ्जाका किसानको मागका आधारमा भुरा वितरण गरेका हौं,’ उनले भने, ‘केन्द्रको स्वीकृत वार्षिक कार्यक्रमअन्तर्गत वालिङ र पुतलीबजार नगरपालिकाका किसानलाई माछा उपलब्ध गराइएको हो ।’
किसानको माग र पोखरीको क्षमताका आधारमा भुरा वितरण गरेको हो । वालिङ नगरपालिकामात्रै १९ माछापालक फर्मका किसानलाई १६ हजार माछाका भुरा वितरण गरिएको पशु शाखा वालिङका प्रमुख डा. वसन्त अधिकारीले बताए ।
‘यहाँका किसानको पोखरीको क्षमता हेरेर विभिन्न जातका माछाका भुरा उपलब्ध गराएका हौं,’ डा. अधिकारीले भने, ‘यसले थप व्यावसायिक उत्पादनमा जोड दिंदै माछामा आत्मनिर्भर बनाउने अभियानलाई सहयोग पुग्ने छ ।’
केन्द्रले बिग हेड कार्प, सिल्भर कार्प, रोहु, नैनी जातका माछाका भुरा वितरण गरेको हो । माछापालन पछिल्लो समय व्यावसायिकरुपमा अगाडि बढेको वालिङ नगर उपप्रमुख कल्पना तिवारीले बताइन् । माछापालनतर्फ किसानको आकर्षण बढ्दै गएको छ जसले गर्दा भोलिका दिनमा वालिङमा आवश्यक पर्ने माछा यहीं उत्पादन गर्न सकिने अवस्था आउनेमा विस्वस्त छु उनको भनाइ थियो । व्यावसायिक उत्पादनका लागि नगरपालिकाले यहाँका किसानलाई अनुदान तथा प्राविधिक सहयोग उपलब्ध गराउनुका साथै उत्पादित वस्तुको बजारीकरणका लागि पनि आवश्यक सहयोग गर्ने उपप्रमुख तिवारीले बताइन् ।