हेमजा । अन्नपूर्ण गाउँपालिका वडा नं. ८ को नवनिर्मित वडा कार्यालय भवनको उद्घाटन गरिएको छ । भवन उद्घाटन गर्दै गाउँपालिका अध्यक्ष युवराज कुँवरले भवन निर्माणसँगै वडाको दैनिक कार्यसम्पादनमा सहजता हुने विश्वास व्यक्त गरे । अध्यक्ष कुँवरले साविक गाविसको (दाङसिङ) भवनसमेत नरहेको उक्त ठाउँमा वडा कार्यालय बन्नु सुखद् भएको जनाए ।
उपाध्यक्ष सगुन गुरुङले संघीयतापछि गाउँमा विकास निर्माणले फड्को मारेको औंल्याउँदै त्यसैको प्रतिफल वडा कार्यालय भएको बताइन् । कार्यक्रममा प्रमुख प्रशासकीय अधिकृत शेषकान्त पौडेल, नेपाली कांग्रेस कास्की ३ का सभापति मनोज गुरुङ, नेकपा एमाले कास्की सदस्य तथा कलाकार सुरेन्द्र गुरुङलगायतले पनि धारणा राखेका थिए ।
जिल्ला समन्वय समिति ६० प्रतिशत तथा गाउँपालिकाको ४० प्रतिशत लागत साझेदारीमा कुल ८३ लाखको लगानीमा दुई तले पक्की भवन निर्माण गरिएको हो । जसमा जम्मा ८ कोठा र ४ शौचालय छन् । वडाध्यक्ष बिजय गुरुङको अध्यक्षतामा भएको कार्यक्रममा वडा सदस्य टेकबहादुर गुरुङले स्वागत तथा पशु प्राविधिक लीलाधर अधिकारीले सञ्चालन गरेका थिए ।