स्याङ्जा । स्याङ्जा प्रहरीले ६६ औं प्रहरी दिवस मनाएको छ । नेपाल प्रहरीको स्थापना दिवसको स्मरण गर्दै आजका दिन प्रहरी दिवस मनाइने गरिन्छ । दिवसमा प्रहरी कार्यालय परिसरमा रहेको सहिद स्मारकमा प्रमुख जिल्ला अधिकारी दीपकराज नेपालले पुष्पमाला अर्पण गरेर दिवसको शुभारम्भ गरे ।
प्रजिअ दीपकराज नेपालले स्याङ्जा प्रहरीले पुर्‍याएको सेवाप्रति आफू सन्तुष्ट रहेको बताए । कार्यक्रममा पूर्व प्रहरी नायब उपरीक्षक श्यामकृण्ण श्रेष्ठ, पत्रकार महासंघका उपाध्यक्ष भवानी अधिकारी, अधिवक्ता तुलसी गिरीलगायतले जिल्लाको शान्ति सुव्यवस्था र कोरोना नियन्त्रणमा प्रहरीका सकारात्मक कार्यको चर्चा गरेका थिए ।
दिवसका अवसरमा कोरोना नियन्त्रणका बेला सहयोग पुरयाएको भन्दै जलाल मिया, समाजसेवी अधिवक्ता तुलसी गिरी, पत्रकार महासंघ स्याङ्जालाई प्रशंसापत्रले सम्मान गरिएको छ ।
पुतलीबजार नगरपालिका ३ निवासी जलाल मियाले कोरोना संक्रमणको तीव्र प्रभाव रहेका बेला उनले व्यक्तिगत १८ वटा अक्सिजन सिलिन्डर प्रहरीलाई सहयोग गरेका थिए । प्रहरी संगठनभित्र रही उत्कृष्ट काम गरेको भन्दै प्रहरी सहायक निरीक्षक कुमार शर्मा र प्रहरी जवान भीमलाल अर्याललाई उत्कृष्ट प्रहरी सम्मान गरिएको छ ।
स्याङ्जा जिल्ला घर भई कामको सिलसिलामा विभिन्न समयमा वीरगति प्राप्त १६ जना प्रहरीका परिवारलाई पनि कदरपत्र प्रदान गरिएको थियो । जिल्ला प्रहरी प्रमुख होबिन्द्र बोगटीको अध्यक्षतामा भएको कार्यक्रममा प्रहरी नायब उपरीक्षक राजेन्द्रप्रसाद अधिकारीले स्वागत एवं प्रहरी निरीक्षक पदमराज थापाले सञ्चालन गरेका थिए ।
प्रहरी दिवसका सन्दर्भ पारेर ४ दिनअघि पुतलीबजार नगरपालिका ५ मा वृक्षरोपण गरिएको थियो । कार्यालयले सम्पादन गरेका कामकारबाहीका बारेमा बनाइएको डकुमेन्ट्री प्रदर्शन गरिएको थियो ।