नवलपुर । लुम्बिनी प्रदेशका प्रहरी प्रमुख डिआइजी मुकुन्दराज आचार्यले सीमा नाकाको आवागमन सहज बनाउन मातहतका प्रहरी प्रमुखलाई निर्देशन दिएका छन् । कोरोना संक्रमण कारण डेढ वर्षदेखि बन्द सीमा नाका खुलेका कारण स्वास्थ्य मापदण्डसहितको आवागमनलाई सहज बनाउन उनले निर्देशन दिएका हुन् ।
६६ औं प्रहरी दिवस अवसरमा जिल्ला प्रहरी कार्यालय पश्चिम नवलपरासीले मंगलबार आयोजना गरेको ‘अमर प्रहरी स्मारक’ उद्घाटन कार्यक्रममा बोल्दै डिआइजी आचार्यले चेकजाँचका नाउँमा नागरिकलाई अनावश्यक दुःख नदिन पनि निर्देशन दिए ।
चाडपर्व नजिकएकाले भारतबाट नेपाल आउने नागरिकको चाप बढ्ने भएकाले स्वास्थ्य मापदण्डलाई ध्यान दिंदै शान्तिसुरक्षाको प्रत्याभूतिसहित सहज आवागमनको व्यवस्था मिलाउन उनले निर्देशन दिए । नागरिकले प्रहरीसँग धेरै अपेक्षा राखेको जनाउँदै उनले प्रहरीको व्यवहारमा अझ सुधारको खाँचो रहेको औलाए ।
जिल्ला प्रहरी कार्यालयका उपरीक्षक मनोजकुमार यादवले तस्करी नियन्त्रणमा आफूले कुनै कसर बाँकी नराखेको जनाउँदै सरुवा भएर आएको ३ महिनाको अवधिमा साढे ३ करोड बराबरका अवैध सामान बरामद गरी भन्सार र राजस्व कार्यालय पठाएको जानकारी दिए ।
यसैबीच सीमा नाकाबाट हुने तस्करी कार्य नियन्त्रणमा उल्लेखनीय कार्य गरेको जनाउँदै जिल्ला प्रहरी कार्यालयमा कार्यरत प्रहरी जवानद्धय महेन्द्र यादव र नरेश कुर्मीलाई प्रशंसा पत्रले सम्मान गरिएको थियो ।