पोखरा । स्पेनिस ला लिगामा चौथो स्थानको सेभिया आफ्नै घरेलु मैदानमै रियल भाल्लाडोलिडसँग बराबरीमा रोकिएको छ ।

शुक्रबार राति भएको एक मात्र खेलमा घरेलु मैदानमा १ गोलले पछि परेको सेभियाले खेल सकिन ७ मिनेट बाँकी छदाँ बराबरी गरेको थियो । लुकास ओकम्पासको पेनाल्टी गोलमार्फत भालाडोल्लिडसँग सेभियाले अंक खोसेको हो ।

खेलको २५औं मिनेटमा किकोले गोल गर्दै भाल्लाडोलिडलाई पहिले अग्रता दिलाएका थिए । पहिलो हाफमा भाल्लाडोलिडले अग्रता कायमै राख्यो । ५५ औं मिनेटमा मुनियर अल हाड्डाईले सेभियाका लागि बराबरी गोल फर्काएपनि भिएआरले उक्त गोललाई मान्यता दिएन ।

खेलको ८३ औं मिनेटमा ओकम्पासले पेनाल्टीमा गोल गरेपछि सेभिया अंक खोस्न सफल भयो । बराबरीले सेभियाको तेस्रो स्थानमा पुग्ने अवसर गुमेको छ । ला लिगाको ३२ खेलबाट ५४ अंक जोडेको सेभिया चौथो स्थानमै यथावत छ । एक खेल कम खेलेको एट्लेटिको मड्रिड ५५ अंकसहित तेस्रो स्थानमा छ । त्यस्तै, ३२ खेलबाट ३५ अंक जोडेको भाल्लाडोलिड १४औं स्थानमा छ ।