पोखरा । गण्डकी प्रदेशको हिउँदे एवं छैठौं अधिवेशन सकिएको छ । मंगलबार बसेको मन्त्रिपरिषद् बैठकले प्रदेश प्रमुखसमक्ष अधिवेशन अन्त्यका लागि आग्रह गरेको थियो । प्रदेशप्रमुख अमिक शेरचनले अधिवेशन अन्त्य गरिदिएका हुन्।

पुस २३ गतेदेखि जारी अधिवेशनमा पछिल्ला ६ वटा बैठक निरन्तर स्थगीत भएको थियो । काँग्रेस सहित विपक्षी दलको अवरोधका कारण निरन्तर स्थगीत संसद चैत ६ गतेदेखि चलेको थिएन । डेढ महिनापछि पुनः बैठक नै नडाकी अधिवेशन अन्त्य गरिएको हो।

सरकारले चैत ११ मा लकडाउन घोषणा गरेपछि सदन अलमलमा थियो । सभामुख नेत्रनाथ अधिकारीले केही दिन यही अधिवेशनमा सदन निरन्तर चलाउने र स्थगित गर्ने तयारी गरेका थिए । यसका लागि ठाउँको खोजी पनि भैरहेको थियो । तर बैठक बस्दै नबसी अधिवेशन सकियो।

काँग्रेसले निर्वाचन क्षेत्र पूर्वाधार विकास कार्यक्रम लगायत विभिन्न १४ बुँदामा असहमति जनाउँदै सदनमा अवरोध गरेको थियो ।