राजेशचन्द्र राजभण्डारी-बागलुङ, ४ वैशाख । कोरोना भाइरस कोभिड १९ लाई लक्षित लकडाउन मजबुत बनाउन बागलुङ प्रहरी कडा रूपमा प्रस्तुत भएको छ । दुई दिन यता बागलुङ बजारबाट लकडाउन उलंघन गर्ने ३ दर्जनभन्दा बढी ब्यक्तिहरू प्रहरीले पक्राउ परेको छ ।

बागलुङ बजार भित्र छरपस्ट हिड्ने ३५ जना पुरूष र एकजना महिलालाई पक्राउ गरेको प्रहरीले जनाएको छ ।सरकारले लकडाउन अबधिभर घर भित्रै सुरक्षित बस्नु भनेर जारी गरेको निर्देशन बागलुङ जिल्लामा पालना नगरी सडकमा छरपस्ट हिड्नेहरूलाई एकसाथ पक्राउ गरेको जिल्ला प्रहरी कार्यालय बागलुङले जनाएको छ ।लकडाउन उलंघन गर्नेहरूलाई पक्राउगरी धौलागिरि बहुमुखी क्याम्पसको प्रांगणमा ४ घण्टा राखी लकडाउन सम्बन्धी सचेतना कक्षा दिएर छोड्ने गरेकोमा अबदेखि लकडाउन उलंघन गर्नेलाई संक्रमण रोग ऐन २०२० दफा २ अनुसार कानुनी कार्वाही गर्ने योजना प्रहरी प्रशासनले बनाएको छ ।

बागलुङ प्रहरीका सूचना अधिकृत हेमबहादुर केसीका अनुसार बुधबारसम्म ४०० जना भन्दा बढी ब्यक्ति प्रहरी कार्वाहीमा परेका छन् भने दुई दर्जनभन्दा बढी मोटर साइकल र स्कुटि जथाभावी रूपमा चलाउने कार्वाहीमा परेका छन् । सरकारले बागलुङ जिल्लालाई कोरोनाको जोखिम जिल्ला घोषणा गरेपछि प्रहरीले आफ्नो सक्रियता बढाएको हो ।