पोखरा ।  र्‍यापीड परीक्षणका क्रममा बागलुङमा एक महिलामा कोरोना संक्रमण पोजिटिभको शंका देखिएको छ । आइतबार गरिएको नमुना परीक्षणमा ६५ बर्षिया महिलाको रिपोर्ट शंकास्पद आएको गण्डकी प्रदेशका स्वास्थ्य निर्देशक डा. विनोदविन्दु शर्माले जानकारी दिए ।

‘आरडिटीबाट गरिएको परीक्षणमा पोजिटिभ देखिएको छ । यो विश्वासिलो मेसिन नै हो,’ उनले भने, ‘यसको पुष्टि गर्न पिसिआर मेसिनमा टेष्ट गर्नैपर्छ । स्वाब लिईएको छ । भोलि दिउँसोसम्म रिपोर्ट आउला । तर यही रिपोर्ट नेगेटिभ आउन पनि सक्छ ।’

• आरडिटीबाट गरिएको परीक्षणमा पोजिटिभ देखिएको छ ।

आरडिटी बाट गरिएको परीक्षणबाट पुष्टी गर्न भने मिल्दैन । पोजिटिभ देखियो भने पुष्टीका लागि ल्यावमा पठाउनुपर्छ । ‘पिसिआर प्रविधिबाट परीक्षण गरेपछि मात्रै संक्रमण भएनभएको भन्ने कुराको पुष्टि हुन्छ,’ शर्माले भने । श्रोतका अनुसार ति महिला केही समयअघि भारतको तीर्थयात्रा गरेर फर्किएकी थिईन् । उनी सहित गएका परिवारभित्रैका अन्य ३ जनाको रिपोर्ट नेगेटिभ आएको छ । तीर्थ यात्रामा १२ जनाको टोली गएको बताईएको छ । अरुको पनि परीक्षण भैरहेको छ ।

गण्डकीमा हालसम्म १ हजार ३सय ८२ जनाको र्‍यापीड टेष्ट गरिएको छ । सबैभन्दा धेरै बागलुङमा ६ सय ७५ जनाको टेष्ट गरिएको छ भने पर्वतमा २ सय ३९, स्याङजामा २ सय ९, लमजुङमा ६६, नवलपुरमा ६२, म्याग्दीमा ५२, तनहूँमा ३३, गोरखामा २०, कास्कीमा १९ र मुस्ताङमा ७ जनाको परीक्षण गरिसकिएको निर्देशनालयले जनाएको छ । मनाङमा हालसम्म परीक्षण भएको छैन ।

नियमित तर्फ चाहीँ ३ सय ६५ परीक्षण भैसकेको छ । त्यसमध्ये ३ सय ९ नेगेटिभ नतिजा आएको छ भने २ पोजिटिभ तथा ५४ वटाको नतिजा आउन बाँकी छ । कोरोना पोजिटिभ देखिएका २ जनाको बागलुङ स्थित धवलागिरी अञ्चल अस्पतालमा उपचार भैरहेको छ ।