नक्कली पासपोर्ट बोकेको अभियोगमा पक्राउ परेका ब्राजिली विश्वकप विजेता स्टार रोनाल्डिन्हो ३२ दिनपछि जेलमुक्त भएका छन् ।

जेलमुक्त भएपनि रोनाल्डिन्होलाई पाराग्वेको एक होटलमा नजरबन्दमा राखिएको छ । रोनाल्डिन्हो दाजुभाइले १६ लाख डलर धरौटी राखेपछि उनीहरूलाई जेलमुक्त गर्दै होटलमा बस्ने सुविधा प्रदान गरिएको हो। उनीहरू अनुसन्धान सम्पन्न नभएसम्मका लागि सुरक्षाकर्मीको निगरानीमा होटलमै बस्नुपर्नेछ ।

गत महिना नक्कली पासपोर्ट प्रयोग गरी पाराग्वे प्रवेश गरेको अभियोगमा ४० वर्षे रोनाल्डिन्हो र उनका भाई रोबर्टो एसिसलाई पक्राउ गरिएको थियो । रोनाल्डिन्हो र उनका भाइले आफूहरूबाट बरामद गरिएका कागजात ब्राजिली व्यापारी विल्मोन्डेस सौसा लिरियाबाट उपहारस्वरुप प्राप्त भएको बताएका थिए। सौसा लिरियालाई यसअघि नै प्रक्राउ गरी जेल चलान गरिएको थियो।

बार्सिलोना, पेरिस सेन्ट जर्मन र एसी मिलानका पूर्व फरवार्ड रोनाल्डिन्होले १९९९ देखि २०१३ सम्म ब्राजिली राष्ट्रिय टोलीबाट खेल्ने क्रममा ९७ अन्तर्राष्ट्रिय खेलको क्याप जितेका थिए ।