हेमजा मेलबोटस्थित गौरीशंकर बहुमुखी क्याम्पसले २९ औं वार्षिकोत्सव अवसरमा विभिन्न प्रतियोगिता सम्पन्न गरेको छ।

जसअनुसार छात्रा भलिबलतर्फ सम्झना नेपालीले नेतृत्व गरेको गुराँस समूह प्रथम, छात्र भलिवलमा राजकुमार विकको सूर्यमुखी समूह पहिलो भए।

त्यस्तै देवेन भण्डारी टोली प्रमुख रहेको गुलाफ समूह हाजिरीजवाफतर्फ प्रथम तथा विनोद पौडेलको सूर्यमुखी समूह दोस्रो भए। त्यस्तै घैटो फुटाईमा कक्षा १२ का नारायण छन्ल्याल पहिलो भए।

बिहीवार स्मृति लेखन, कवडी र नेपाली/अङग्रेजी निबन्ध समेत गरिएको थियो। जसमा स्मृति लेखनतर्फ बीएड पहिलो वर्षकी कविता विक प्रथम, बीबीएस तेस्रो वर्षकी स्नेहा पौडेल दोस्रो तथा बीएड दोस्रो वर्षकी आश विक र बीबीएस तेस्रो वर्षकी सुजाता सिके तृतीय भए।

कवड्डीमा छात्रातर्फ शीतल विकको समूह प्रथम र छात्रतर्फ राहुल विकको समूह पहिलो भयो।

शुक्रबार म्यूजिकल चियर गरिने अतिरिक्त कार्यक्रम संयोजक सहायक प्राध्यापक राजाराम पोख्रेलले जानकारी दिए।

उनले आगामी वर्ष अतिरिक्त क्रियाकलापलाई वार्षिक कार्यतालिका बनाई सम्पन्न गर्ने प्रतिबद्घता पनि जनाए। वार्षिकोत्सव समारोह शनिवार विविध कार्यक्रमबीच सम्पन्न हुँदैछ।