मंसिर १३, पाल्पा । पाल्पामा सामाजिक डिभिजन विकास कार्यालय स्थापना भएको छ । प्रदेश सरकार, सामाजिक विकास मन्त्रालय, बुटवलबाट पाल्पा र गुल्मी जिल्ला कार्यक्षेत्र निर्धारण गरी कार्यालय स्थापना गरिएको हो ।

कार्यालय स्थापनाका अवसरमा बोल्दै मन्त्रालयका योजना तथा प्रशासन महाशाखाका उपसचिव केशव अर्यालले सामाजिक न्याय, सशक्तिकरण र समाजकल्याणका क्षेत्रमा मन्त्रालयबाट हुँदै आएका क्रियाकलापहरू सुविधाजनक तरिकाले प्राप्त गर्नाका लागि मन्त्रालयकै स्रोत साधनका आधारमा डिभिजन कार्यालय स्थापना गरिएको बताए ।

उनले सामाजिक विकास मन्त्रालय अन्तर्गतको स्वास्थ्य कार्यालयको आफ्नै संरचना भएकोले स्वास्थ्य बाहेकका शिक्षा, युवा तथा खेलकुद महिला तथा बालबालिका, जेष्ठ नागरिक, भाषा, सरसफाइ लगायत कार्यहरूको योजना, कार्यान्वयन र मूल्याङ्कन लगायतका कार्य डिभिजन कार्यालयबाट नै सम्पन्न हुने बताए । विशेषगरी स्थानीय सरकारहरूसँग समन्वयमा कार्य गरिने भएकाले स्थानीय सरकार र कार्यालयबीच समन्वय, सहयोग र सहकार्य हुनु जरूरी भएको अर्यालले बताए ।

पाल्पा तानसेनस्थित शिक्षा तालिम केन्द्र भवनमा रहेको यस डिभिजन कार्यालयका प्रमुख लक्ष्मण ज्ञवालीले सम्बन्धित सबैसँग समन्वय गरेर कार्य गर्ने प्रतिवद्धता ब्यक्त गरे । मन्त्रालयका कार्यहरूको सम्प्रेषण स्थानीय तहसम्म गर्ने पुलको काम गर्नेगरी प्रदेश नं. ५ अन्तर्गत २÷२ वटा जिल्ला कार्यक्षेत्र तोकी नवलपरासी र रुपन्देहीका लागि रुपन्देही, पाल्पा र गुल्मीका लागि पाल्पा, अर्घाखाँची र कपिलवस्तुका लागि कपिलवस्तु, दाङ र रोल्पाका लागि दाङ, प्यूठान र रुकुमका लागि प्यूठान र बाँके र बर्दियाका लागि बाँकेमा डिभिजन कार्यालय रहने गरी प्रदेश नं. ५ सरकारबाट निर्णय गरिएको थियो ।प्रदेश सरकारका कार्यहरूको विस्तार जिल्लास्तरसम्म गरिएका कारण सेवाग्राहीको पहुँच बढ्न जाने र कार्यको गुणस्तर बृद्धि हुनसक्ने विश्वास लिइएको छ ।