पोखरा, ११ मंसिर । पोखरा–९ नयाँबजार स्थित प्रदर्शनी केन्द्रसँगै जोडिएको फोहोर फाल्ने खाल्डोमा अज्ञात समूहले राखेको बम बिस्फोट हुँदा २ सर्वसाधारण घाइते भएको छन् ।
प्रदर्शनी केन्द्रमा कास्की निर्वाचन क्षेत्र नं २ को उपनिर्वाचनका लागि सत्तारुढ नेपाल कम्युनिस्ट पार्टी (नेकपा)को चुनावीसभा भइरहेको समयमा ठूलो आबाजमा बम विस्फोट हुँदा सभामा सहभागी सर्वसाधारणको भागदौड मच्चिएको थिए ।

प्रदर्शनी केन्द्रमा भइरहेको सभामा नेकपा संसदीय दलका नेता सुवासचन्द्र नेम्वाङले भाषण गर्दै थिए । दिउसो १.०० बजे बम विस्फोट भएको थियो । बम विस्फोटबाट पार्किङ गरी राखेको पोखरामा संचालित एक माइक्रोवसको पछिल्लो भागमा क्षति पुगेको छ ।

बम विस्फोट नजिकै स्कुटरमा बसेका दुई पुरुष व्यक्ति बमको छर्रा लागेर घाइते भएका हुन् । उनीहरुको टाउकोमा चोट लागेको छ । उपचारका लागि उनीहरुलाई अस्पताल लगिएको छ । घाइतेको नामभने प्रहरीले खुलाएको छैन् । बम विस्फोट भएको स्थान नेपाली सेना, सशस्त्र प्रहरी र जनपथ प्रहरीले घेराबन्दीमा राखेका छन् । वम विस्फोट भएको पाँच मीनेटपछि नेकपाका अध्यक्ष प्रचण्डले चुनावी सभालाई सम्वोधन गरी तुरन्त राजधनी काठमाण्डौ फर्किएका छन् ।