सरकारले राष्ट्रिय महिला भलिबल टिमलाई नगदसहित सम्मान गरेको छ। राजधानीमा मंगलबार एक कार्यक्रमकाबीच सरकारले भलिबल टिमलाई जनही ३ लाख नगदले सम्मान गरेको हो।

बंगलादेशमा भएको एभीसी सेन्ट्रल जोन महिला भलिबल च्याम्पियनसीपको उपाधि जित्दै ऐतिहासिक सफलता प्राप्त गरेपछि सरकारले भलिबल टिमलाई सम्मान गरेको हो। खेलाडीलाई अर्थमन्त्री युवराज खतिवडा र खेलकुद मन्त्री जगतबहादुर विश्वकर्माले संयुक्त रूपमा सम्मान गरे।

बंगलादेशमा ऐतिहासिक उपाधि जितेपछि सरकारले नेपाली टिमलाई जनही ३ लाखले पुरस्कृत गर्ने घोषणा गरेको थियो। महिला भलिबल टिमले जितेको यो उपाधि नेपालको पहिलो अन्तराष्ट्रिय उपाधि हो। यस्तै, सरकारले दक्षिण एसियाली खेलकुद (साग) मा पदक बिजेता खेलाडीलाई विगतको भन्दा उल्लेख्य पुरस्कार दिने घोषणा गरेको छ।

मंगलबार प्रधानमन्त्री केपी शर्मा ओलीले १३ औँ सागका खेलाडीहरुलाई विशेष सम्बोधन गर्ने कार्यक्रममा स्वास्थ्यका कारण उपस्थित हुन नसकेपछि अर्थमन्त्री डा. युवराज खतिवडाले सम्बोधन गरे।

उनले खेलाडीलाई उल्लेख्य नगद पुरस्कारसहितको सम्मान गर्ने घोषणा गरेका थिए।