पोखरा, ३ मंसिर । गण्डकी प्रदेश प्रमुख अमिक शेरचनलाई नेपाली सेनाको सैनिक कमाण्ड तथा स्टाफ कलेजमा तालिमरत प्रशिक्षार्थीले सामेवार भेट गरेका छन् ।

अवलोकन भ्रमणका क्रममा पोखरा पुगेको सो टोलीले तालिममा सीकेका विषय र अनुभव सो अवसरमा अभिव्यक्त गरेको थियो । ४५ दिने सो तालिममा लेवनान, अमेरिका, नाइजेरीया भारत, चीन लगायत दश वटा देशका ६३ जनाको सहभागिता रहेकोमा २७ जना नेपाली सहभागीले प्रदेश प्रमुखसँग भेट गरेका हुन् ।

सो अवसरमा नेपाली सेनाको सैनिक कमाण्ड तथा स्टाफ कलेजका उपरथी एवं शिक्षाध्यक्ष इश्वर हमाल, सेनानी अनुप थापा, सेनानी रवीन्द्र थापा र सशस्त्र प्रहरीका डीएसपी रवीन्द्र श्रेष्ठले तालिम तथा तालिममा सिकेका सीप, ज्ञान र अनुभव बारे बताएका थिए ।

कलेजका मुख्य शिक्षक महासेनानी द्रव्यराम भण्डारीले स्टाफ कलेजेको स्थापना र कलेजले दिने विभिन्न तालिमका बारेमा बताएका थिए । प्रमुख सेनानी झलेन्द्र भट्टराई धन्यवाद ज्ञापन गरेका थिए । सो अवसरमा गण्डकी प्रदेश प्रमुख शेरचनले देशको सामाजिक सदभाव, राष्ट्रिय एकता र राष्टिय अखण्डता जोगाउन पूर्खाहरुले गरेको योदानलाई स्मरण गर्दै सोही अनुरुप काम गर्न सहभागी प्रशिक्षार्थीलाई आग्रह गरे । उनले सबै शिक्षार्थीलाई सफलताको शुभकामना ब्यक्त गरे ।