जर्मनीले युरोकप छनोटमा प्रभावशाली जित निकालेको छ। खेलमा स्पेनिस क्लब रियल म्याड्रिडका एट्याकिङ मिडफिल्डर टोनी क्रुस चम्कँदा जर्मनीको जित सम्भव भएको हो।

शनिबार राति भएको खेलमा घरेलु टोली जर्मनीले बेलारुसमाथि ४–० को प्रभावशाली जित हात पारेको हो।

खेलमा लगातार बेलारुसलाई दवावमा राखे पनि जर्मनीले गोलको लागि ४१औं मिनेट कुर्नुपरेको थियो। डिफेन्डर म्याथियस जिन्टरले सर्जी जिनाब्रीको पासमा गोल गर्दै जर्मनीलाई पहिलो हाफमा १–० को अग्रता दिलाउन सफल भएका थिए। पहिलो हाफमा १ गोल गरेपनि जर्मनीले दोस्रो हाफमा तीन गोल गर्न सफल भयो। ४९औं मिनेटमा लियोन गोरेट्जकाले टोनी क्रुसको पासमा गोल गर्दै अग्रता दोब्बर पारे। त्यसपछिको दुवै गोल टोनी क्रुसको नाममा रह्यो।

५५औं मिनेटमा क्रुसले पहिलो गोल गर्दा जर्मनीले खेलमा ३–० को अग्रता बनायो। ७५औं मिनेटमा बेलारुसले पाएको पेनाल्टीलाई सदुपयोग गर्न सकेन। त्यसपछि ८३औं मिनेटमा क्रुसले गोल गर्दै जर्मनीलाई ४–० को प्रभावशाली जित दिलाए। जितसँगै जर्मनीले समूह ‘सी’ मा ७ खेलबाट १८ अंक जोडेर शीर्षस्थानमा रहेको छ। नेदरल्यान्ड १६ अंकसहित दोस्रो स्थानमा छ। बेलारुस ४ अंकसहित चौथो स्थानमा छ।

सो समूहको अर्को खेलमा उत्तरी आयरल्यान्ड र नेदरल्यान्डले गोलरहित बराबरी खेल्दै अंक बाँडेका छन्।