पोखरा, १ मंसिर । दुबै मृगौलाले काम नगरेपछि उपचारर्थ बागलुङ गलकोट नगरपालिका– २ नरेठाँटीका ३६ वर्षीय गमप्रसाद श्रीसमगरलाई बेलायतमा संकलित १ लाख ७० हजार ५ सय रुपैयाँ नगद सहयोग प्रदान गरिएको छ ।

बागलुङ समाज, बेलायतकी अध्यक्ष छविमाया पुनको पहलमा संकलित उक्त रकम गलकोट नगरपालिका–२, नरेठाँटी घरभई बेलायतबस्दै आएका मेजर देवबहादुर पुनले उक्त सहयोग रकम मृगौलापीडित श्रीसलाई हस्तान्तरण गरेका हुन् ।

पुनले बागलुङ–पोखरा मगर समाजद्वारा आयोजित एक कार्यक्रमबीच मृगौलापीडित श्रीसलाई मेजर पुन र बागलुङ–पोखरा मगर समाजका अध्यक्ष रामबहादुर पुनले संयुक्त रुपमा उक्त सहयोग रकम प्रदान गरेका हुन् । श्रीसको शीघ्र स्वास्थ्य लाभको कामना गर्दै मेजर पुनले श्रीसको उपचारका लागि सबैले सहयोग गर्नुपर्ने धारणा राखे । मृगौलापीडित श्रीसले बेलायतमा बस्दै आएका र बागलुङ समाजले गरेको सहयोगले मृगौला प्रत्यारोपण गर्न सहयोग पुग्ने बताए ।

वैदेशिक रोजगारीका सिलसिलामा संयुक्त अरब इमिरेट्सको दुबईमा सात वर्ष कार्यरत मृगौलापीडित श्रीस बिरामी भएपछि स्वदेश फर्केका थिए । मृगौला प्रत्यारोपणका लागि ठूलो धनराशि खर्च हुने भएकाले आर्थिक अभावका कारण उपचारमा समस्या भएको पीडितले बताउदै आएका छन् । यसअघि, बेलायतबाटै १ लाख ५० हजार रुपैयाँ, जापानबाट ५ लाख ५० हजार रुपैयाँ, दक्षिण कोरियाबाट २ लाख १२ हजार र बागलुङ–पोखरा मगर समाजबाट ४० हजार ५ सय ५ रुपैयाँ सहयोग प्राप्त भएको मृगौलापीडित श्रीसले बताए । हालसम्म सहयोग गर्नेहरूलाई धन्यवाद दिँदै उनले सहयोगी मनहरूको साथले आफूले नयाँ जीवन पाएको अनुभूति गरेको समेत बताए ।