विराटनगर, १६ कात्तिक । विराटनगरबाट भारतको कोलकतातर्फ सुन लैजाँदै गरेका दुई भारतीय कालीगढलाई प्रहरीले पक्राउ गरेको छ ।
पक्राउ पर्नेमा भारत पश्चिम बंगाल दुधली जिल्ला कमुदुवा ग्रामपञ्चायत बस्ने ३९ वर्षीय स्वर्पकुमार वाग र सोही स्थानका शेष सडानलाई प्रहरीले पक्राउ गरेको हो ।
पक्राउ परेका उनीहरुको साथबाट सिक्का र टुक्रा गरी ६६ ग्राम सुन बरामद भएको जिल्ला प्रहरी कार्यायल, मोरङका डीएसपी घनश्याम श्रेष्ठले जानकारी दिए ।विराटनगरबाट सुन लिएर जाँदै गरेको सूचना पाएपछि दुईजनालाई नियन्त्रणमा लिएको डीएसपी श्रेष्ठले बताए । पक्राउ परेकाहरुलाई बिहीबार भन्सार कार्यालय, विराटनगरमा बुझाइएको छ । प्रहरीले सुन पठाउने पसल सञ्चालमाथि अनुसन्धान भइरहेको जनाएको छ ।

पक्राउ परेकाहरुले गहना बनाउनका लागि सुन लिएर कोलकताका लागि हिँडेको बयान दिएका छन् । विराटनगरका केही व्यापारीहरू सुनका गहना बनाउनका लागि कोलकत्तासम्म पुग्ने गरेका छन् । नयाँ डिजाइनका गहना निर्माण गर्न भन्दै भारततर्फ सुन तस्करी हुने गरेको प्रहरी स्रोत बताउँछ ।