पोखरा महानगरपालिका वडा कार्यालय १ देखि नजिकै रहेको माछापुच्छ्रे बैंक जाने सिढी बाटो जोखिमपूर्ण भएको भन्दै स्थानीयले सुधारको माग गरेका छन्।

उक्त बाटो छोटो पर्ने भएकाले धेरै सर्वसाधारण सोही बाटो हुँदै आवातजावत गर्ने गरेकोमा चिप्लिएर लड्ने समस्या आएको भन्दै स्थानीयले सुधारको माग गरेका हुन्।

त्यसबारे वडा कार्यालयमा लिखित जानकारी पनि गराइएको बगर निवासी सूर्य दाहालले बताए।

चिप्लो बाटोको कारण गर्भवती महिला, अपाङ्ता भएका व्यक्ति, बुढाबूढी, विद्यार्थी सबैभन्दा बढी मर्कामा परेका छन्। स्थानीयले तत्काल बाटो मर्मत, सुधार गरी जोखिम न्यूनीकरण गरिदिन वडा कार्यालयमा आग्रह पनि गरेका छन्। सो बाटोमा दैनिक ५० जनाभन्दा बढी मानिस चिप्लिएर लड्ने गरेको स्थानीयको भनाइ छ।

पानी परेको समयमै अझ बढी समस्या हुने जनाइएको छ। सिंढी निर्माण गर्दा घेरै चिप्लो ढुंगा प्रयोग गरिएकोले सो समस्या आएको स्थानीयको आरोप छ।

हरिचोक टुँडीखेलबाट लामाचौर, भलाम, मणिपाल शिक्षण अस्पताल, डिभिजन वन कार्यालय, शिक्षा कार्यालय, पृथ्वीनारायण क्याम्पस तथा विभिन्न कामकाजमा आवातजावत गर्दा छोटो दुरी पर्ने भएका कारण दैनिक सयौं मानिस सोही बाटो रोज्छन्।

यता वडा कार्यालय भने समस्याप्रति ध्यानाकर्षण भएको भन्दै चालु आर्थिक वर्षभित्रै बाटो सुधार गर्ने आश्वासन दिएको छ।