लमजुङ, ३० साउन । लमजुङमा स्थानीय सरकारको जवाफदेहिता प्रवद्र्धन सम्बन्धी मार्ग निर्देशन बारे अन्तरक्रिया गरिएको छ । गाउँपालिका राष्ट्रिय महासंघ नेपालको आयोजनामा क्व्होलासोंथर गाउँपालिका– ३ घलेगाउँमा उक्त अन्तरक्रिया गरिएको हो । स्थानीय सरकारको कार्य सम्पादनलाई प्रभावकारी बनाउन महासंघले अन्तरक्रियाको आयोजना गरेको हो ।

गाउँपालिका अध्यक्ष प्रेम घलेले गाउँपालिकाका कार्य सम्पादनलाई मजबुत बनाउन सामाजिक जवाफदेहिताको एकीकृत मार्ग निर्देशिका पारित गरी थप प्रभावकारी बनाउँदै नमूना गाउँपालिका बनाउने प्रतिवद्धता व्यक्त गरे । उनले आफ्नो कार्यसम्पादनका क्रममा पारदर्शी र उत्तरदायित्व सम्बन्धमा कुनै कमी हुन नदिएको बताए । उनले महासंघ आफ्नै संस्था रहेको भन्दै महासंघले लिएको नीति कार्यक्रमलाई अँगाल्दै अगाडि बढ्ने बताएका थिए ।

गाउँपालिकाका प्रमुख प्रशासकीय अधिकृत पीताम्बर सारुले जवाफदेहिताका औजारको प्रयोग र परीक्षण गर्दै गाउँपालिका अगाडि बढिरहेको जानकारी दिए । उनले आपसमा छलफल गरी नयाँ नयाँ औजारहरूले कार्यसम्पादनमा सुधार ल्याउने र क्रमशः लागू गरिदै जाने प्रतिवद्धता व्यक्त गरे । अन्तरक्रियामा स्थानीय सरकारको जवाफदेहिता प्रवद्र्धन सम्बन्धी मार्गनिर्देशन बारेमा गाउँपालिका महासंघ नेपालका कार्यकारी निर्देशक बिमल पोखरेल र अधिवक्ता बिष्णु पोखरेलले सहजीकरण गरेका थिए ।

स्थानीय तहका तल्लो तहको नागरिकहरूमा सुसूचित गराउन तथा सार्वजनिक खर्च व्यवस्थापन पारदर्शीता बढाउन, नागरिकका गुनासा तथा असन्तुष्टीहरूलाई कमी गर्दै लैजान र समृद्धिमा नागरिक सहभागिता बढाई दिगो बनाउन अन्तरक्रियाको आयोजना गरिएको गाउँपालिका महासंघ प्रदेश समन्वय अधिकृत शिव रेग्मीले बताए ।उक्त अन्तरक्रियामा क्व्होलासोंथर गाउँपालिका पदाधिकारी र कर्मचारीहरूले भाग लिएका थिए ।