नेशनल प्याव्सान कास्कीको आयोजनामा भएको १५ औं अन्तरविद्यालय हाजिरीजवाफ प्रतियोगितामा पुष्पसदन एकेडेमी प्रथम भएको छ।

प्रतियोगितामा त्रिवेणी पब्लिक सेकेण्डरी स्कूल द्वितीय, ज्ञानज्योति बोर्डिङ स्कूल तृतीय र डायमण्ड मोडल स्कूल सान्त्वना भएका थिए। विजयी विद्यार्थीलाई ट्रफी र प्रमाणपत्र प्रदान गरिएको थियो।

विद्यार्थीको अन्तरनिहित प्रतिभा प्रस्फुटन गर्नै उद्देश्यले नेशनल प्याव्सान कास्कीमा आवद्ध विद्यालयबीच सो जवाफ प्रतियोगिता आयोजना गरिएको हो। दुई दिनसम्म चलेको प्रतियोगितामा ४१ वटा विद्यालयको सहभागिता थियो।

प्रतियोगितामा प्रकाश कँलेल, विचित्र न्यौपाने, प्रकाश तिवारी र ऋषिकेश श्रेष्ठले सहजीकरण गरेका थिए।

प्रमुख अतिथि पोखरा महानगरपालिका शिक्षा महाशाखाका प्रमुख गंगाबहादुर गुरुङले पढाइ अलावा अतिरिक्त क्रियाकलाप सञ्चालन गरी विद्यार्थीमो क्षमता अभिवृद्धि गर्नै काममा एनप्याव्सान अग्रस्थानमा रहेको बताए।

कार्यक्रममा नेशनल प्याव्सानका केन्द्रीय वरिष्ठ उपाध्यक्ष ज्ञानेन्द्रमोहन भट्टराई, नेशनल प्याव्सान कास्कीका प्रथम उपाध्यक्ष शिवदत्त तिवारी, सदस्य रमेशराज पौडेलले कार्यक्रम माथि प्रकाश पारेका थिए।

नेशनल प्याव्सान कास्कीका अध्यक्ष रामबहादुर मोचीको अध्यक्षतामा भएको कार्यक्रममा कार्यक्रम संयोजक विक्रम सुवेदीले स्वागत र सदस्य अर्जुन अधिकारीले सञ्चालन गरेका थिए।