ग्लोबल आईएमई बैंकका सेवाग्राहीलाई गण्डकी मेडिकल कलेजमा छुट हुने भएको छ।

कलेजका प्रमुख प्रशासकीय अधिकृत कृष्णराज घिमिरे र बैंकका गण्डकी प्रदेश प्रमुख अजय थापाबीच समझदारीपत्रमा हस्ताक्षर भएको हो। सम्झौता अनुसार बैंकका डेबिट, क्रेडिट, प्रिभिलेज कार्ड होल्डर र कामदारलाई विभिन्न शीर्षकका स्वास्थ्य सेवामा छुट हुनेछ।

सबैभन्दा धेरै रजिष्ट्रेसन फिमा २५ प्रतिशत छुट छ भने ल्याब, एक्सरे, युएसजी, सिटी स्क्यान, एमआरआई, बेड चार्ज, ईसिजी, ईइजी, फिजिओथेरापी, डेण्टल, ईको र डोप्लरमा १० प्रतिशत छुट हुने कलेजका प्रशासन प्रमुख कृष्ण पौडेलले जानकारी दिए।

कलेजले ५ सय ५०  शैयाको अस्पताल सञ्चालन गरिरहेको छ। नेपाल सरकारबाट सञ्चालित सामाजिक स्वास्थ्य सुरक्षा बीमा कार्यक्रम, नवजात शिशु सुरक्षा कार्यक्रम, क्षयरोग, रक्तसञ्चार सेवा र क्यान्सर तथा न्यूरो बिरामीका लागि १ लाखसम्मको उपचार खर्च नेपाल सरकारबाट दिने गरी नयाँ कार्यक्रम सञ्चालन गर्दै आएको छ। यो वर्षदेखि मुटुका बिरामीका लागि क्याथ ल्याबसमेत सञ्चालन तयारी भइरहेको पौडेलले बताए।