साउन ११,पोखरा । पोखराको बगालेटोलस्थित सोपाल तमु समाजमा शनिबार आयोजित मिलिजुली कप मेन्स डबल्स ब्याडमिण्टन प्रतियोगिताको उपाधि उपेन्द्र श्रेष्ठ र छबि सुवेदीको जोडीले जितेको छ ।

फाइनल खेलमा शिव शर्मा र अम्मर महर्जनको जोडीलाई २१–१८ र २१–१८ को सोझो सेटमा पराजित गर्दै उपेन्द्र जोडीले सो उपाधि जितेको हो । प्रतियोगितामा नारायणहरि तिवारी र हेमकृष्ण श्रेष्ठ तथा दीपक मुल्मी र सुरेश श्रेष्ठको जोडीले तृतीय स्थान हाँसिल ग¥यो ।

विजयी खेलाडीलाई गण्डकी प्रदेशका सांसद कृष्ण थापाले एक समारोहकाबीच ट्रफि, मेडलले पुरस्कृत गरे । पुरस्कार प्रदान गर्दै सांसद थापाले स्वस्थ्य नागरिक उत्पादन र अनुशासित समाज निर्माणका लागि यस्ता प्रतियोगिताले निरन्तरता पाउनुपर्नेमा जोड दिए ।

सोपाल तमु समाजमा नियमित रुपमा ब्याडमिण्टन खेल्दै आएका खेलाडीहरुको विभिन्न २२ समूहले प्रतियोगितामा सहभागिता जनाएका थिए । खेलाडीबीच भाइचारा अभिबृद्धिका लागि बेलाबखत मिलिजुली कप आयोजना हुँदै आएको प्रतियोगिता संयोजक ठाकुर सिग्देलले जानकारी दिए । सञ्जीबहादुर कोइरालाको सभाध्यक्षमा सम्पन्न समारोह अर्का खेलाडी विजय साहीले सञ्चालन गरेका थिए ।