फुर्केटारी सामुदायिक वन उपभोक्ता समूहको पहलमा हेमजास्थित सुइँखेत खोलामाथिको फुर्केटारी पुल स्तरोन्नति गरिएको छ।

सो पुलबाट कास्कीकोट र हेमजावासी प्रत्यक्ष लाभान्वित हुने छन्। कुल ७५ फिट लम्बाइ र ४ फिट चौडाइको फलामे ट्रस पुल निर्माण गरिएको छ।

सो ठाउँमा बाँसको पुल रहेकोमा गत वर्ष बाढीले सो पुल जीर्ण बनेको थियो। अहिले सिमेन्टेड फलामे ट्रस पुल निर्माण गरिएको हो। सो पुलमा डेढ इन्च बाक्लो फलेक बिछ्याइएको छ।

स्तरोन्नतिका लागि २ लाख खर्च लागेको वन समूहका सल्लाहकार कमलमणि त्रिपाठीले जानकारी दिए। जसमध्ये आइतवारसम्म १२ हजार रुपैयाँ सहयोग जुटेको छ।

स्तरोन्नतिमा वन समूहका सल्लाहकार मधुसुदन त्रिपाठी, कमलमणि त्रिपाठी, देवकृष्ण त्रिपाठी, होतराज त्रिपाठी र सदस्यहरु विष्णुप्रसाद त्रिपाठी, लालमोहन त्रिपाठी र धनबहादुर विकको उल्लेख्य योगदान रहेको बताइएको छ।