म्याग्दी,२६ असार । म्याग्दी सदरमुकाम बेनीमा दुई दिनसम्म संचालित विद्यालय स्तरीय पाँचौ ‘राष्ट्रपति रनिङ शिल्ड’ को उपाधि न्यू वेष्ट पोइन्टले हात पारेको छ ।

बुधबार बेनीमा सम्पन्न प्रतियोगिताको अन्तिम फाइनल खेलमा १३ स्वर्ण, ११ कास्य र ३ रजत पदकसहित न्यू वेष्ट पोईन्ट आवसीय माध्यामिक विद्यालयले उपाधि चुम्न सफल भएको हो ।

प्रतियोगितामा १० स्वर्ण, ९ कास्य र २ रजत पदक हात पारेको माउण्ट एभरेष्ट आवसीय मावि उपविजेता बनेको छ । सामुदायिक विद्यालयबाट प्रकाश माविले ७ स्वर्ण, २ कास्य र १ रजत पदक सहित तेस्रो हासिल गरेको छ ।

वेष्टपोईन्टका ईश्वर सेन्चुरी ४ स्वर्ण र सोही विद्यालयकी आईशा केसीले ३ स्वर्ण १ कास्य सहित जितेर प्रतियोगिताका उत्कृष्ट खेलाडी बने । संघीय संरचना अनुसार नगर र गाउँपालिकास्तरमा संञ्चालन गरिएको प्रतियोगिताबाट पहिलो र दोस्रो भएका विद्यालय र खेलाडीबीच जिल्ला तहमा प्रतिस्पर्धा गराईएको हो ।

भलिवल खेलमा छात्रा तर्फ बेनी नगरपालिकाको माउण्ट एभरेष्ट आवसीय माविलाई ३–१ सेटमा पराजित गरी अन्नपूर्ण गाउँपालिकाको ज्ञानप्रकाश मावि पहिलो भएको छ । त्यसैगरी छात्र भलिवल तर्फ मंगला गाउँपालिकाको मंगला माविलाई ३–१ सेटमा पराजित गरी बेनीको माउण्ट एभरेष्ट आवसीय मावि प्रथम हुन सफल भएको भलिबल प्रशिक्षक तेजिन्द्र बानियाँले जानकारी दिए ।

प्रतियोगितामा छात्र र छात्रा भलिवल, एथलेटिक्स तर्फका छात्र/छात्रा एक, दुई, चार, आठ सय र पाँच हजार मिटर दौड, एक/एक तथा चार/चार रिले दौड, सटफुट, हाईजम्प, लङ्गजम्प, ट्रिपलजम्प र मार्सल आर्टसका विभिन्न खेल समावेश थियो । प्रतियोगितामा पहिलो, दोस्रो र तेस्रो हुने बिद्यालयले क्रमश शिल्ड, प्रमाण–पत्र, मेडल र नगद १५ हजार, १२ हजार र ९ हजार नगद हात पारेका छन् ।

प्रतितियोगितामा विजेता र उपविजेता टिमलाई प्रदेश सभा सदस्य विनोद केसीले बधाई दिएका थिए ।सांसद केसीले प्रतियोगिताले विद्यालय स्तरमा लुकेर रहेको प्रतिभा उजागर गर्नमा मदत पुगेको बताए ।

जिल्ला खेलकुद विकास समितिका अध्यक्ष कृष्णकुमार विश्वकर्माले प्रतियोगितामा छनौट भएका विद्यालयले पोखरामा हुने गण्डकी प्रदेशस्तरीय खेलकुदमा सहभागी हुने जानकारी दिए । बर्षातको समयमा विद्यालय बन्द भएको तथा हतारमा प्रतियोगिता संचालन गरेकाले नगर र गाउँपालिका स्तरमा भएको प्रतियोगिताको सबै विधाका विजेता र उपविजेता टिमले सहभागिता जनाउन नसकेको अध्यक्ष विश्वकर्माको भनाई छ ।