पोखरा । थाइल्याण्डको बैंककमा हुने खुल्ला कराते च्याम्पियनसीपमा सहभागी टोलीलाई सोमबार विदाई गरिएको छ ।

राष्ट्रिय टिममा रहेर १३ औं दक्षिण एशियाली खेलकुदको लागि तयारी गरिरहेका नेपाली कराते टोलीलाई राजधानीमा आयोजित एक कार्यक्रमबीच विदाई गरिएको हो ।

मित्र राष्ट्र थाइल्याण्डको बैंककमा यही असारको २५ देखि २९ सम्म आयोजना हुँदै छ । नेपाली टोली मंगलबार थाइल्याण्डतर्फ प्रस्थान गर्ने कार्यक्रम छ । च्याम्पियनसीपमा सहभागी नेपाली टोलीको ब्यवस्थापकमा आठौं सागका स्वर्णधारी रबि महर्जन छन् ।

सहभागी खेलाडीहरुमा महिलातर्फ ५३ केजी समूहकी अस्मिता राई, ६८ केजी समूहकी सनी तामाङ, एकल कातातर्फकी चञ्चला दनुवार र टिम कातातर्फकी सरु कार्की र कोपिला बिष्ट छन् ।

त्यस्तै पुरुषतर्फको ५५ केजी समूहका सोनाम लामा, ८४ केजी समूहका दिवश श्रेष्ठ, एकल तथा टिम कातातर्फ मण्डेकाजी श्रेष्ठ, टिम कातातर्फ सुभाष कार्की र प्रविन मानन्धर छन् ।

तालिम तथा प्रशिक्षण विभाग प्रमुख अर्जुन बिक, महेन्द्र राई र नेपाल कराते महासंघका महासचिव हरिशरण केसी लगायतले व्यवस्थापक तथा खेलाडीहरुलाई बिदाई गरेका हुन् ।

कार्यक्रममा प्रशिक्षण विभाग प्रमुख बिक, राई र महासंघका महासचिव केसीले टोलीलाई बिदाई गर्दै शुभकामना मन्तव्य दिए । राष्ट्रिय टिममा रहेर १३ औं सागको तयारी गरिरहेका खेलाडीहरुले सागमा पदक हात पार्न सफलताको शुभकामना दिए । च्याम्पियनसीपको सहभागिताले खेलाडीहरुको परीक्षण हुने र खेलाडीहरुलाई अनुभवको अवसर भएको उनीहरुको भनाई थियो ।