अन्तरविद्यालय वडाध्यक्ष कप फुटबलमा सेमिफाइनल समीकरण पूरा भएको छ। सेमिफाइनलमा शान्ति निकुञ्ज, ढुङ्गेसाँघु बोर्डिङ स्कूल, फिस्टेल एकेडडेमी र पार्दी मावि सेमिफाइनल पुगेका छन्।

शुक्रबार शान्ति निकुञ्ज बोर्डिङविरुद्ध ढुङ्गेसाँघु बोर्डिङ स्कूलबीच पहिलो सेमिफाइनल हुनेछ। साथै दोस्रो सेमिफाइनलमा फिस्टेल एकेडेमीविरुद्ध पार्दी माविले सामना गर्ने आयोजक ड्यामसाइड क्लबले जनाएको छ।

विहीवार पहिलो क्वार्टरफाइनलमा शान्ति निकुञ्जले एलपी देवकोटा बोर्डिङ स्कूललाई २–१ गोलले हराउँदै सेमिफाइनल पुगेको हो। उक्त खेलमा शान्ति निकुञ्जका विजय गुरुङ म्यान अफ दि म्याच बने।

दोस्रो खेलमा ढुङ्गेसाँघु बोर्डिङले शिशुकल्याण बोर्डिङलाई टाइब्रेकरमा ८–७ गोलले हराउँदै सेमिफाइनल पुगेको हो। निर्धारित समयमा दुबै टोलीबाट कुनै पनि गोल हुन नसकेपछि खेल टाइब्रेकरमा पुगेको थियो। उक्त खेलमा ढुङ्गेसाँघुका दिवस कार्की म्यान अफ दि म्याच बने।

तेस्रो खेलमा फिस्टेल एकेडेमीले एक्स–आर्मी बोर्डिङलाई ३–१ गोलले हराउँदै सेमिफाइनल प्रवेश गर्यो। उक्त खेलमा फिस्टेल एकेडेमीका संजोग गुरुङ म्यान अफ दि म्याच बने।

चौथोमा पार्दी माविले ओम एकेडेमीमाथि १–० को जित निकाल्यो। उक्त खेलमा पार्दी माविका सफल राई म्यान अफ दि म्याच बने।