पोखरा, ७ जेठ । नेपाल नाई संघ कास्कीको जिल्ला परिषद् सम्पन्न भएको छ । जिल्ला अध्यक्ष विगुलाल ठाकुुरको अध्यक्षतामा भएको सभामा प्रमुख अतिथि नेपाल ट्रेड युनियन कांग्रेस कास्की अध्यक्ष विजयराज भण्डारीले संगठनको एकतामा जोड दिएका थिए ।

नाई संघद्वारा प्रकाशित वार्षिक क्यालेन्डरसमेत विमोचन गर्दैै प्रमुख अतिथि भण्डारीले मजदुरको समस्यामा नेपाल ट्रेड युनियन कांग्रेस डटेर लड्ने बताए । पेसागत हकहितमा एकताबद्ध हुन सके जस्तोसुकै समस्या पनि समाधान गर्न सकिने भन्दै जिल्ला परिषदको सफलताको कामना गरे ।

उनले मजदुरको पक्षमा सधै लड्दै आएको नेपाल ट्रेड युनियन कांग्रेसले सधै श्रमजीवीको पक्षमा वकालत गर्नेमा जोड दिए । कार्यक्रममा नेपाल नाई संघका केन्द्रीय वरिष्ठ उपाध्यक्ष लालबाबु ठाकुरले समस्या समाधान गर्दै अगाडि बढेको नाई संघले सदस्यता बृद्धिमा ध्यान दिन आग्रह गरे ।

नेपाल ट्रेड युनियन कांग्रेस कास्कीका सहसचिव केदार धमलाले कार्यक्रममा शुभकामना दिँदै बलियो संगठन निर्माणमा जोड दिए । सहसचिव धमलाले पेसालाई सुरक्षित र मर्यादित बनाउन अनुरोध गर्दैै पर्यटकीय क्षेत्र पोखरामा नाई संघको सेवा उत्कृष्ठ बनाउन आग्रह गरे ।

जिल्ला उपाध्यक्ष रामनाथ ठाकुर (आनन्द)ले स्वागत गरेको सभामा सन्दिप ठाकुरले कार्यक्रम सञ्चालन गरेका थिए ।परिसदले शुल्कमा नियमितता, पसलमा सरसफाइ, प्रभावकारी सेवा र संघको निर्णयको पूर्ण कार्यान्वयनमा जोड दिएको छ ।