भवन शिलान्यास गर्न कार्यक्रमस्थलमा पुग्दा स्थानीयले विरोध गरेपछि नगर प्रमुख घिमिरे मञ्चमै नपुगी फर्किए।

बुटवल, १८ वैशाख। देशभरी सार्वजनिक जग्गा हडप्नेको विवरण सार्वजनिक भैरहँदा सर्वसाधारणहरुमा पनि सार्वजनिक जग्गा संरक्षणमा चासो बढेको छ।

उनीहरुले सार्वजनिक जग्गा मनपरि वितरण गर्ने स्थानीय सरकारलाई पनि चुनौती दिन थालेका छन्।

रुपन्देहीको तिलोत्तमा नगरपालिकामा स्थानीयले एक व्यापारिक संस्थालाई दिईएको जग्गामा भवन शिलान्यास गर्नै खोज्दा अवरुद्ध गरेका हुन्।

तिलोत्तमा व्यापार संघले वडा ५ मा बुधबार बिहान सचिवालय भवन शिलान्यास गर्न लागेकोमा सो कार्य स्थानीयले रोकेका छन्।

संघले शिलान्यासका लागि तिलोत्तमा नगरपालिकाका नगर प्रमुख (मेयर) वासुदेव घिमिरेलाई प्रमुख अतिथिका रुपमा बोलाएको थियो।

तर कार्यक्रमस्थलमा पुग्दा स्थानीयले विरोध गरेपछि नगर प्रमुख घिमिरे मञ्चमै नपुगी फर्किए। स्थानीयले सार्वजनिक जग्गा संघसंस्थालाई हडप्न नदिने भन्दै नाराबाजी गरेका थिए।

उनीहरूले संस्थालाई भवनका लागि जग्गा दिँदा टोल कमिटीसँग समेत छलफल नगरेको आरोप लगाए। स्थानीय काशिनाथ पाण्डेले वडा ५ मा गाडेर्नसहितको वृद्धाश्रम बनाउने भनिएकोमा अहिले संघसंस्थालाई जग्गा दिएका कारण विरोध गरिएको बताए। तीन वर्षअघि जनप्रतिनिधि नआउँदा नै सर्वदलीय बैठकले संघलाई वडा ५ मा १५ कठ्ठा जग्गा दिने निर्णय गरेको तिलोत्तमा व्यापार संघका अध्यक्ष जेपी कँडेलले बताए।