पोखरा, १७ वैशाख । पोखरा–१७ स्थित राममन्दिरमा सम्पन्न ज्ञान महायज्ञको आयव्यय सार्वजनिक गरिएको छ ।

२०७५ चैत्र २३ देखि २०७६ वैशाख १ गतेसम्म संचालित उक्त महायज्ञबाट एक करोड एक लाख ९० हजार १४ रुपैयाँ बचत भएको थियो ।

महायज्ञ मूल आयोजक समितिका महासचिव पुण्डरीप्रसाद बराललेले आफुहरुले सोचेको भन्दा बढी रकम दान सहयोग भएको बताए । महायज्ञमा संकलित १ करोड १७ लाख ८८ हजार ३ सय ३२ भएकोमा १५ लाख ९८ हजार १४ खर्च भई वचत एक करोड एक लाख भएको हो ।

राम मन्दिर परिसर भित्र निर्माणाधिन धर्मशालाको भौतिक संरचना निर्माण, वैदिक सनातन हिन्दु धर्म संस्कृतिको संरक्षण, मन्दिरको पश्चिम तर्फको जग्गामा गुरुकुल आश्रम निर्माण, संस्कृत शिक्षाको अध्ययन अध्यापन, धर्म संस्कृतिको संरक्षण सम्वद्र्धन र समाजमा आईपर्ने सबै प्रकारका धार्मिक कार्यहरु गर्ने गराउने उद्देश्यलाई मुर्तरुप दिन महायज्ञ संचालन गरिएको महायज्ञ मूल आयोजक समितिका अध्यक्ष लीलाभक्त आचार्यले बताए ।

कार्यक्रमका प्रमुख अतिथि स्वामी नारायण मुक्तिनाथ विकास ट्रष्टका संरक्षक स्वामी कृष्णदासजीले यस धामको भौतिक निर्माण र अन्य विकासका लागि आफ्नो संस्थाबाट सक्दो सहयोग गर्ने पतिबद्धता व्यक्त गरे ।

उक्त अवसरमा राम मन्दिर सञ्चालक समीतिका कोषाध्यक्ष गंगाधर पौडेलले महायज्ञको आयव्ययका बारेमा विस्तृत जानकारी गराएका थिए । संस्कृतिविद दयानिधि गौतमले कथा प्रवचन गरेको महायज्ञको आयब्यय सार्वजनिकीकरण कार्यक्रममा विभिन्न संघसंस्थाका प्रतिनिधि एवं झाँकी सहितको कलश यात्रामा सहभागिलाई सम्मान पत्रद्वारा सम्मानित गरिएको थियो ।