पोखरा, १२ वैशाख । पोखरा नगर क्षेत्रभित्र १५ जनामा मलेरिया रोग भेटिएको छ ।

विश्व औलो दिवस २०७६ को अवसरमा स्वास्थ्य निर्देशनालय गण्डकी प्रदेशद्वारा विहीवार पोखरामा आयोजित अभिमुखीकरण कार्यक्रममा सो कुराको जानकारी दिईएको हो ।

कास्कीमा १६ जना औलो रोगका विरामी भएकोमा १५ जना महानगरपालिका भित्र कै भएको कास्कीका जनस्वास्थ्य प्रमुख राजेन्द्र घिमिरेले जानकारी दिएका छन् ।

गण्डकी प्रदेशमा ३६ जना मलेरियाका विरामी र नेपालमा १ हजार १ सय ८७ विरामी रहेको तथ्याङक उनले दिए । मलेरिया रोग पोथी लामखुट्टेको टोकाइबाट सर्ने जनस्वास्थ्य कार्यालय कास्कीका भेक्टर कन्ट्रोल निरीक्षक यम बरालले वताए । नेपालमा ४ सय जातका लामखुट्टे पाइने र तिनले विभिन्न रोग जस्तै मलेरियाको पनि संक्रमण गराउने उनले वताए ।

निर्देशनालय जनस्वास्थ्य प्रशासक श्रवणकुमार नायकको अध्यक्षतामा भएको कार्यक्रममा स्वास्थ्य निरीक्षक गोविन्द ढकाल, विनिता सुवेदी र वडा नं ८ का वडा सदस्य किरण गौतम लगायतले वोलेका थिए ।