पोखरा २१ चैत। वडालाई सुन्दर बनाउन पोखरा–८, सडकछेउका बिजुलीका पोलमा फूलका गमला राखिएको छ।

पृथ्वीचोकबाट जिरो किमीसम्म १ सय ६० वटा पोलमा फूलका गमला राखेको हो। पोखरा महानगरपालिकाका कावा प्रमुख मञ्जुदेवी गुरुङले पृथ्वीचोकबाट पोलमा फूलको गमला राखेर शुरुवात गरिन्। उनले पोखरा आफैमा सुन्दर शहर भएको बताउँदै वडाले शुरुवात गरेको कामले थप सुन्दर बनाउने उल्लेख गरिन्।

वडाध्यक्ष रुद्रनाथ बरालले वडालाई सौन्दर्यकरण गर्ने उद्देश्यले पोलमा फूलका गमला राखिएको बताए। उनले फूल र गमलाको संरक्षण पृथ्वीचोक र जिरो किमी क्षेत्रका व्यवसायी र घरधनीले गर्नुपर्ने बताए।

वडा सदस्य पुष्पराज सिग्देलले वडाको सौन्दर्यकरण गर्ने अभियानअन्तर्गत फूलका गमला राखिएको बताए। कार्यक्रमको सञ्चालन वडा सचिव भेषराज शर्माले गरेका थिए।