पोखरा, १६ चैत । जापानमा जारी अन्तर्राष्ट्रिय जुनियर (यु–१२) कोपा पुमा टोरेरस फुटबल प्रतियोगितामा नेपालले उत्कृष्ट खेल प्रर्दशन गरेको छ । नेपालले आफ्ना ४ खेलमा जित निकाल्दै विदेशी टिमहरुमाझ प्रभावशाली खेल प्रस्तुत गरेको छ ।

समूह चरण अन्तर्गतको पहिलो खेलमा नेपालले कावासाकी फ्रोण्टेल विरुद्ध गोलरहित बराबरि खेलेको थियो भने माल्भा विरुद्धको अर्को खेलमा एलेक्स पौडेलको निर्णायक गोलमा १–० को जित निकाल्यो । त्यस्तै नुमाजु एफसीलाई नेपालले ४–० गोलले पराजित गरेको एन्फा कास्कीका अध्यक्ष समेत रहेका टिम म्यानेजर मिलन गुरुङ्गले जानकारी दिए ।

प्रतियोतिगामा भाग लिन १४ सदस्यिय टोली जापान पुगेको हो । राजेन्द्र तामाङ प्रशिक्षक रहेको टिमका खेलाडीहरुमा स्याङजाका आर्यान गुरुङ र विशाल बिक, काठमाण्डौका एलेक्स पौडेल, बागलुङका विविध थापा मगर, म्याग्दीका विज्ञान गौचन, धादिङका प्रकाश तामाङ, अर्धाखाँचीका समिर गौतम र कास्कीका विश्वास ओझा, सविन नेपाली र सफल थापा रहेका छन ।

नेपाली जुनियर खेलाडीहरुका लागि यो अबसर भने नेपालका पूर्व राष्ट्रिय खेलाडी बसन्त गौचनले मिलाएका हुन । जापानमा फुटबल प्रशिक्षकका रुपमा कार्यरत गौचनले चार वर्ष देखि यूवा खेलाडीलाई निःशुल्क रुपमा जापान खेल्न जाने अवसर मिलाइराखेका छन् ।