पोखरा, ११ चैत। कृष्ति–पोखरा सम्पर्क समाज कास्की र कृष्ति–पोखरा मिलन बचत तथा ऋण सहकारी संस्था लिमिटेड छोरेपाटनले संयुक्त रुपमा सोमबार खुला रक्तदान कार्यक्रम गरेको छ।

छोरेपाटनस्थित डेभिजफलमा आयोजित कार्यक्रममा ६२ जनाले रक्तदान गरेका थिए।

प्रमुख जिल्ला अधिकारी चक्रप्रसाद बुढाले पहिलो रक्तदाता पोखरा–२१ कृष्तिका शान्ता थापालाई ब्लडब्याग हस्तान्तरण गरी कार्यक्रम उद्घाटन गरेका थिए। कार्यक्रममा प्रजिअ बुढाले रक्तदान पुण्य कार्य भएको उल्लेख गरे।

त्यस अवसरमा नेपाल रेडक्रस सोसाइटी कास्कीका सभापति डोलराज पाण्डेय, युवा रेडक्रस सोसाइटीका अध्यक्ष डिल्लीराम बराल, छोरेपाटन सुधार समितिका अध्यक्ष चूडामणि बराल, समाजका सल्लाहकार विजयराज आचार्य, सल्लाहकार श्रीराम सुवेदी, कृष्ति पोखरा मिलन सहकारी संस्थाका अध्यक्ष कमलबहादुर रेग्मी, कृषि सञ्जाल पोखरा–२१ का अध्यक्ष उमानाथ सुवेदी लगायतले रक्तदानको महत्वबारे बोलेका थिए।

कृष्ति–पोखरा सम्पर्क समाज कास्कीका अध्यक्ष पदमबहादुर थापाको अध्यक्षतामा भएको कार्यक्रममा प्रथम उपाध्यक्ष मीना रानाभाटले स्वागत, सचिव कुलदीप आचार्य र सहसचिव पवित्रमणि भण्डारीले संयुक्त रुपमा कार्यक्रम संचालन गरेका थिए।