भद्रपुर, ८ चैत । युवा तथा खेलकूदमन्त्री जगतबहादुर विश्वकर्माले आठौँ राष्ट्रिय खेलकूद प्रतियोगिताको मिति सरेको जनाएका छन् ।

मन्त्री विश्वकर्माले अगामी वैशाखमा राष्ट्रिय खेलकुद प्रतियोगिता हुने बताएका छन् । झापाको भद्रपुरस्थित मेची रङ्गशालामा निर्माणाधीन दोस्रो कभर्डहलको निरीक्षणका क्रममा मन्त्री विश्वकर्माले वैशाख पहिलो सातादेखि प्रतियोगिता सञ्चालन हुने जानकारी दिए ।

राष्ट्रिय खेलकूद परिषद्को बोर्ड बैठकले उद्घाटनको मिति तोक्ने उनले बताए । बाँकेस्थित नेपालगञ्ज रंगशालामा प्रतियोगिता सञ्चालन हुने यसअघि नै निधो भइसकेको छ । ‘चैतको तेस्रो सातादेखि प्रतियोगिता शुरु गर्ने योजना बनाएका थियौँ,’ मन्त्री विश्वकर्माले भने, ‘रंगशालामा प्यारापिटलगायत आवश्यक पूर्वाधार निर्माण सम्पन्न हुन ढिलाइ हुँदा मिति परिवर्तन गर्नुपरेको हो ।’