पोखरा, ५ चैत । धुर्मुस सुन्तली फाउण्डेशनले चैतको २३ गते मातृभूमी मैत्रीपूर्ण क्रिकेट प्रतियोगिता खेलाउने भएको छ ।

फाउण्डेसनले मंगलबार काठमाण्डौंमा पत्रकार सम्मेलन गरेर उक्त कुराको जानकारी गराएको हो । फाउण्डेशनका अध्यक्ष सिताराम कट्टेल ‘धुर्मुस’ले चैतको २३ गते कीर्तिपुरमा प्रतियोगिताको आयोजना गर्ने भएको जानकारी दिएका हुन् । ‘धुर्मुस’ कट्टेलका अनुसार चितवनमा बन्दै गरेको गौतम बुद्ध अन्तराष्ट्रिय क्रिकेट रंगशाला निर्माणका लागि सहयोगार्र्थ रकम संकलनका लागि प्रतियोगिता गर्न लागिएको हो ।

प्रतियोगितामा राष्ट्रिय दुई टिमले प्रतिस्पर्धा गर्नेछ । राष्ट्रिय टिम ‘ए’ र राष्ट्रिय टिम ‘बी’ दुई टिमले प्रतिस्पर्धा गर्नेछ । राष्ट्रिय टिम ‘ए’ बाट पारस खड्काले र राष्ट्रिय टिम ‘बी’ बाट ज्ञानेन्द्र मल्लको कप्तानीमा प्रतियोगिता हुनेछ ।

प्रतियोगितालाई थप रोमाञ्चक बनाउन राष्ट्रिय कलाकारहरुले समेत क्रिकेट खेल्नेछन् । चर्चित हांस्य कलाकारहरु मदनकृष्ण श्रेष्ठ र हरिवंश आचार्यको दुई छुट्टाछुट्टै नेतृत्वमा कलाकारहरु क्रिकेट मैदानमा उत्रनेछन् ।